لغمان کې د ویالو او کانالونو په رغولو سره د بزګرانو ستونزې هوارې شوي دي
۳ وری ۱۴۰۰
د لغمان ولایت دکرنې، اوبولګولو او مالدارۍ ریاست وایي، چې په دې ولایت کې د اوبو رسولو د لویو ویالو او کانالونو په بیارغولو سره د اوبولګولو په برخه کې ددې ولایت د یوشمېر بزګرانو ستونزې هوارې او ترڅنګ یې د اوبو د ضایعاتو مخه نیول شوې ده.
د لغمان ولایت د کرنې، اوبولګولو او مالدارۍ رییس محمدجمیل خوشحال وایي، چې د لغمان مرکز اړوند بدیع الاباد، مسکین اباد، چهل ګزي بابا، کټل، خوشکې تاله، میداني سه صده او قلع شیخانو په کلیو کې د ملګرو ملتونو د خوړو او کرنې ادارې «FAO» په مالي او د لغمان د کرنې ریاست په تخنیکي همکاریو د یادو سیمو د اوبو رسولو د لویو ویالو او کانالونو ځینې سیمې، د ویالو پشتونه او پلچکونه په پاخه او اساسي ډول رغول شوي دي.
دښاغلي خوشحال په خبره د یادو چارو په پلي کېدو سره د اوبولګولو په برخه کې د سیمې د بزګرانو یوشمېر ستونزې هوارې شوي دي او ترڅنګ یې د اوبو د ضایعاتو مخه نیول شوې ده، چې په پایله کې به یې د بزګرانو ستونزې هوارې او د دوی حاصلات به ورسره زیات شي.
