ننګرهار کې د نیالګیو اېښودو کمپاین پیل شو

۱۹ سلواغه ۱۳۹۹
د ننګرهار د کرنې، اوبولګولو او مالدارۍ ریاست وایي، چې په دې ولایت کې د نیالګیواېښودو کمپاین د «یو نیالګی د ځان او بل د افغانستان لپاره» تر شعار لاندې پیل شوی دی، چې په ترڅ کې به یې ددې ولایت په بېلابېلو سیمو کې څه باندې دوه میلیونه مثمر او غیر مثمره نیالګي کېښودل شي.
په دې اړه د ننګرهار عالي لېسه کې په جوړه شوې غونډه کې، د ولسمشر سلاکار او د ننګرهار ولي ضیاالحق امرخېل او ددې ولایت یوشمېر نورو چارواکو ګډون درلود، چې د یادو چارواکو له خوا د ننګرهار په عالي لېسه کې د نیالګیو په اېښودو سره په دې ولایت کې د نیالګیو اېښودو کمپاین رسماً پیل شو.
دننګرهار د کرنې، اوبولګولو اومالدارۍ ریس انجنیرانعام الله صافي وویل، چې سږ کال دنیالګیو وېش نهادینه شوې اود بېلابېلو ادارو سره د هوکړه لیکونو تر لاسلیک وروسته د هېواد د سرسبزي او ښکلا په موخه  ورکول کېږي.
ښاغلی صافی وویل، چې سږ کال دننګرهار کرنې ریاست له لورې په خصوصي او دولتي روزنځایونو کې ٢.٣ میلیونه نیالګي روزل شوې، چي له دې ډلې ۲۲۸ زره نیالګي یې په ننګرهار کې ښونځیو، مدارسو، لویو لارو، روغتونونو او نورو عامه ځایونو کې کېنول کیږې ترڅو د هېواد دزرغونتیا او ښکلا لامل شي.
دغه راز ددې پروګارم  په پیل کې، د ښوونې او روزنې، ښاروالۍ ، عامې روغتیا او نورو ادارو سره دنیالګیو د ورکړي هوکړه لیکونه هم لاسلیک شول.