د کرنې وزیر د هلمند والي او ددې ولایت د یوشمېر دولتي اداراتو له رییسانو سره په کتنه کې: د مالدارۍ او بڼوالۍ پر پراختیا خبرې اترې
۳۰ لیندۍ ۱۳۹۹
د کرنې، اوبولګولو او مالدارۍ وزیر ډاکټر انوارالحق احدي د هلمند والي جنرال عبدالنبي الهام، د کرنې رییس زلمی الکو او ددې ولایت د دولتي اداراتو له یوشمېر نورو رییسانو سره د خپل کار په دفتر کې وکتل او ددې ولایت د مالدارۍ او بڼوالۍ پر پراختیا یې خبرې اترې وکړې.
د هلمند والي او ورسره مل پلاوي، په هلمند کې د کرنې وزارت له برنامو څخه د مننې ترڅنګ، د هلمند کرنیز وضعیت په هکله خبرې وکړې او په دې ولایت کې د خرماوو د نویو بڼونوجوړولو، د شېدې ټولولو او پروسس د مرکزونو جوړولو او د سبو د پروسس د مرکزونو د جوړولو غوښتونکي شول. دوی دغه راز د کرنې او مالدارۍ په برخه کې د لاډېرو پروژو د پلي کېدو غوښتنه وکړه.
په دې لیدنه کې دکرنې وزیر ډاکټر انوارالحق احدي وویل، چې د کرنې وزارت د خرماو د بڼوالۍ د لا دودولو او د مالدارۍ د وضعیت ښه کولو په پار د خرماوو لاډېر بڼونه او د شېدې ټولولو مرکزونه جوړي.
په همدې حال کې دکرنې وزیر وویل، چې د هلمند په ولایت کې د سبو د پروسس مرکزونو جوړولو په پار به د کرنې وزارت لاډېرې پاملرنې وکړي.
