د خاورې کارونې د څرنګوالي په پار روزنیز پروګرام په لاره واچول شوه

۲۶ لړم ۱۳۹۹
د کرنې وزارت د خاورې پېژندنې او څېړنو ریاست، د کرنې او کلیوالي بازارونو پراختیا لپاره د اروپایي ټولنې د پروژې په همکارۍ، د کرنې په وزارت کې د «د تلپاتې کرنې په پار د خاورې روغتیا» تر نوم لاندې روزنیز پروګرام په لاره واچول.
دغه روزنیز پروګرام کرنیزو خاورو سره د بزګرانو د بلدتیا او له کیمیاوي سرو پرته  دحاصلاتو زیاتوالی او کیفیت ښه کولو په موخه په لاره اچول شوې وه.
د کرنې وزارت د خاورې پېژندنې او څېړنو د برخې رییس حمید احمدزی وایي: «زموږ موخه داده، چې زموږ دهېواد بزګران پرته له دې چې له کیمیاوي سرو ګټه پورته کړي، د ځمکې پر حاصل کار وکړي، له کیمیاوي سرو پرته په طبیعي ډول خاوره کولا شي، چې د دوی د محصولاتو تولید او کیفیت کې ښه بدلون رامنځته کړي، خو په هغه صورت کې، چې په تخصصي ډول هغه کرنیز عملیات چې موږ یې ورته وایي تر سره یې کړي. موږ د خپلو څېړنیو پایلې د وزارت د ترویج له کارکوونکو سره شریکوو تر څو په ټولو ولایتونو کې یې له بزګرانو سره شریک کړي.»
دغه روزنیز پروګرام د یوې ورځې لپاره د کرنې په وزارت کې په لاره اچول شوې وه، چې په کې د کابل پوهنتون یوشمېر استادانو، د کرنې وزارت او د کرنیزو پروژو د ترویج کارکوونکي ګډون درلود.