لغمان کې د ترویج ۶۰ تنه کارکوونکي وروزل شول

۱۶ تله ۱۳۹۹
د لغمان د کرنې، اوبولګولو او مالدارۍ ریاست له خوا ددې ولایت ۶۰ تنه د ترویج کارکوونکو او بزګرانو ته د حاصلاتو راټولولو وروسته د چارو مدیریت په برخه کې روزنه ور کړل شوې ده.
د لغمان د کرنې رییس انجنیر محمدجمیل خوشحال وویل، چې د کرنیزو تولیداتو د کچې لوړولو ترڅنګ د راټولولو څخه یې وروسته ساتنه او زېرمه کول ډېر اړین دي. هغه وویل، چې ددې برنامې موخه داده، چې بزګران خپل محصولات په سمه توګه مدیریت کړي او له ټولولو وروسته یې په سمه توګه زېرمه او په مناسب وقت کې یې بازار ته وړاندې کړي، ترڅو بزګران لوړ عواید تر لاسه کړي.
ښاغلی خوشحال وویل، چې دوی د دې ولایت د بزګرانو د عوایدو زیاتولو په پار هلې ځلې کوي او په دې برخه کې ګڼې برنامې په پام کې لري.