د کندهار د کرنې رییس له همکارو مؤسسو سره د کرنیزو پروژو د اغېزمن پلي کېدو او د همکاریو د پیاوړتیا په موخه سکتوري غونډه وکړه

mail-admin
سه‌شنبه ۱۴۰۵/۷/۲۱ - ۱۴:۵۹

۲۱ تله ۱۴۰۵ هـ.ش
۱ جُمَادَى الأول ۱۴۴۸ هـ.ق
د کندهار ولایت د کرنې، اوبو لګولو او مالدارۍ رییس مولوي عبدالرازق ابوالامین، د همکارو مؤسسو له ولایتي استازو سره د کرنیزو او مالدارۍ پروژو د ارزونې، د روانو او راتلونکو فعالیتونو د همغږۍ او د ګډو همکاریو د پیاوړتیا په موخه سکتوري غونډه ترسره کړه.
دغه غونډه، چې د کندهار د کرنې ریاست په کاري دفتر کې د یاد ریاست د یو شمېر آمرینو په ګډون جوړه شوې وه، موخه یې له نوي ټاکل شوي رییس سره د همکارو مؤسسو د استازو پېژندنه، د هغوی د فعالیتونو ارزونه او د راتلونکو پروګرامونو په اړه د نظرونو تبادله وه.
د غونډې په پیل کې د همکارو مؤسسو ولایتي استازو د خپلو مؤسسو د فعالیتونو، کاري ساحو، روانو پروژو او راتلونکو پلانونو په اړه معلومات وړاندې کړل او د کرنې، اوبو لګولو او مالدارۍ په برخو کې یې د خپلو پروګرامونو او همکاریو پر دوام ټینګار وکړ.
ورپسې د کندهار د کرنې، اوبو لګولو او مالدارۍ رییس مولوي عبدالرازق ابوالامین د همکارو مؤسسو فعالیتونه، په ځانګړې توګه د خلکو بېړنیو اړتیاوو ته د رسېدنې په برخه کې مهم وبلل او ټینګار یې وکړ، چې د مرستندویه پروګرامونو او پراختیايي پروژو د طرحې او پلي کېدو پر مهال باید د خلکو واقعي اړتیاوې، لومړیتوبونه او شته ستونزې په پام کې ونیول شي.
نوموړي وویل، چې د کرنیزو او مالدارۍ پروژو د اغېزمنتیا، د سرچینو د غوره کارونې او د خلکو د اړتیاوو د پوره کولو لپاره د کرنې ریاست او همکارو مؤسسو ترمنځ دوامداره همغږي، ګډې مشورې او نږدې همکاري اړینه ده.
د کندهار د کرنې رییس له همکارو مؤسسو وغوښتل، چې د پروژو د پلي کېدو په ټولو پړاوونو کې له اړوندو مسؤلینو سره لازمې مشورې وکړي او خپلې مرستې او فعالیتونه د بزګرانو، مالدارانو او اړمنو کورنیو د لومړیتوبونو له مخې تنظیم کړي.
هغه دغه راز د کرنیزو او مالدارۍ فعالیتونو د پراختیا، د پروژو د پر وخت پلي کېدو او د همکارو مؤسسو د چارو د ښه ترسره کېدو په موخه د کرنې ریاست له لوري د هر اړخیزې همکارۍ ډاډ ورکړ.
د غونډې په پای کې د همکارو مؤسسو مسؤلینو د کندهار د کرنې رییس له ملاتړ او همکارۍ مننه وکړه او ژمنه یې وکړه، چې د روانو پروژو د پر وخت بشپړولو، د اغېزمنو او اړتیاوو پر بنسټ د ولاړو پروژو د پلي کولو، د ګډې همغږۍ د پیاوړتیا او د نویو پراختیايي پروژو د راجلبولو په برخه کې به خپلې هڅې دوامدارې وساتي.
د یادونې وړ ده، چې د کرنې، اوبو لګولو او مالدارۍ وزارت د هېواد په بېلابېلو ولایتونو کې له کورنیو او نړیوالو همکارو مؤسسو سره د همغږۍ او ګډو همکاریو له لارې د کرنیزو تولیداتو د زیاتوالي، د مالدارۍ د ودې، د اوبو لګولو د سیستمونو د ښه والي او د بزګرانو د اقتصادي وضعیت د پیاوړتیا لپاره هڅې کوي، څو د شته امکاناتو او سرچینو په اغېزمنې کارونې سره د کرنې او مالدارۍ سکتور ته لا ډېر خدمتونه وړاندې شي.

تازه ترین اخبار

شنبه ۱۴۰۵/۸/۳۰ - ۱۶:۱۳
Background image

ننګرهار کې ۱۰۰ تنو د ستروسو او سبو پروسس کوونکو ته د ۲.۶ میلیونه افغانیو په ارزښت وسایل ووېشل شول

۳۰ لړم ۱۴۰۵ هـ.ش
۱۰ جُمَادَى الثانی ۱۴۴۸ هـ.ق
د ننګرهار ولایت د کرنې، اوبو لګولو او مالدارۍ ریاست په هڅو، د «ډاکار» مؤسسې په تخنیکي همکارۍ او د ملګرو ملتونو د نشه‌یي توکو او جرمونو سره. . .

چهارشنبه ۱۴۰۵/۸/۶ - ۱۱:۵
Background image

نورستان کې سلګونو اړمنو بزګرانو ته د اصلاح شویو تخمونو او کیمیاوي سرو د وېش لړۍ پیل شوه

۶ لړم ۱۴۰۵ هـ.ش
۱۶ جُمَادَى الأول ۱۴۴۸ هـ.ق
د نورستان ولایت د کرنې، اوبو لګولو او مالدارۍ ریاست په همغږۍ، د خوړو او کرنې نړۍوالې ادارې «اف‌اې‌او» په مالي ملاتړ او د «اې‌وای‌اس‌او» مؤسسې. . .

چهارشنبه ۱۴۰۵/۸/۶ - ۹:۳۰
Background image

ننګرهار کې د غنمو ننداریزو کروندو لپاره اصلاح شوي تخمونه او کیمیاوي سرې ووېشل شوې

۶ لړم ۱۴۰۵ هـ.ش
۱۶ جُمَادَى الأول ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست په تخنیکي همکارۍ او د کرنې وزارت په مالي ملاتړ، د دغه ولایت په اوو ولسوالیو کې د غنمو ننداریزو. . .

بازگشت