کرنې وزارت کې د خالصه جایدادونو معلوماتي سیستم پیل شو
۱۱ کب ۱۴۰۴ه.ش
۱۳ رَمَضانُ المُبارَک ۱۴۴۷ه.ق
د کرنې، اوبو لګولو او مالدارۍ وزارت د مالي او اداري مرستیال مولوي نورالدین عمیر په مشرۍ په جوړه شوې ناسته کې، د کرنې وزارت د احصایې او کرنیزو معلوماتو ریاست کارکوونکو د خالصه جایدادونو د معلوماتي سیستم د جوړېدو خبر ورکړ او ویې ویل، چې یاد سیستم د معلوماتو د مدیریت د پیاوړتیا او د خدمتونو د وړاندې کولو د ښه والي په موخه طرحه شوی او دا مهال د پلي کېدو په حال کې دی.
په دې سیستم کې د مرکز او ولایتونو په کچه ټول خالصه جایدادونه په منظم ډول ثبت او ډلبندي کېږي. د کرایي، اجارې، مشارکتي، غصبي او پاکو جایدادونو اړوند معلومات، د ځمکو له درجهبندۍ، جغرافیایي موقعیت او د کارونې له ډول سره یو ځای په دې سیستم کې درج کېږي.
د چارواکو په وینا، د دې سیستم رامنځته کول به د خالصه ځمکو د غصب د مخنیوي، د جایدادونو د مدیریت د بهیر د روڼتیا او پر وخت او کره معلوماتو ته د لاسرسي په اسانتیا کې مهم رول ولوبوي. همداراز دغه اقدام به د غوره پرېکړو نیولو، اغېزمنې څارنې او د امارتي جایدادونو د اغېزمنې استفادې لپاره زمینه برابره کړي.
د کرنې وزارت چارواکو ټینګار کوي، چې د دې سیستم په بشپړېدو او پراختیا سره به د جایدادونو د مدیریت بهیر معیاري شي او د خالصه ځمکو اړوند خدمتونه به په ټول هېواد کې په لا اغېزمنه توګه وړاندې شي.
