د میدان وردګو ولایت په څلورو ولسوالیو کې د «سياراس» مؤسسې ارزونیز سفر ترسره شو
۹ کب ۱۴۰۴ه.ش
۱۱ رَمَضانُ المُبارَک ۱۴۴۷ه.ق
د میدان وردګ ولایت په جلریز، نرخ، سیداباد او چک ولسوالیو کې د «سياراس» مؤسسې مسؤلو کسانو ارزونیز او معلوماتي سفر ترسره کړ.
یاد پلاوي د کرنې، اوبو لګولو او مالدارۍ ریاست له مسؤلو کارکوونکو سره په بشپړې همکارۍ د یادو ولسوالیو بېلابېلو حوزو ته سفر وکړ. د سفر اساسي موخه په دغه ولایت کې د کرنې سکتور د وضعیت ارزونه او له نږدې بزګرانو څخه د ستونزو او اړتیاوو په اړه معلومات راټولول وو.
د سفر پر مهال د مؤسسې او د کرنې ریاست مسؤلینو له بزګرانو سره لیدنې ترسره کړې او د کرنیزو فعالیتونو، شته امکاناتو، حاصلاتو، ستونزو او اړتیاوو په اړه یې تفصیلي معلومات تر لاسه کړل. بزګرانو هم د کرنې اړوند بشپړ معلومات وړاندې کړل او خپلې غوښتنې او وړاندیزونه یې ورسره شریک کړل.
د«سياراس» مؤسسې مسؤلینو څرګنده کړه، چې میدان وردګ ولایت د مڼو د بڼونو له پلوه بډای ظرفیت لري او هر کال ښه حاصلات ورکوي، خو د حاصلاتو د ساتنې لپاره لا زیاتې سړې خونې ته اړتیا ده. دوی ټینګار وکړ چې د مڼو د سړو خونو جوړول به د بزګرانو د عوایدو په زیاتوالي، د ضایعاتو په کمولو او د بازار موندنې په ښه والي کې مهم رول ولوبوي.
د میدان وردګو ولایت دکرنې ریاست چارواکي ژمن دي څو له همکارو مؤسسو سره په ګډه د بزګرانو د ملاتړ، د کرنیزو حاصلاتو د ښه مدیریت او د بنسټیزو اسانتیاوو د پراختیا لپاره هڅې لا ګړندۍ کړي.
