د کرنې، اوبو لګولو او مالدارۍ وزارت نوی مالي او اداري مرستیال معرفي شو
۹ سلواغه ۱۴۰۴ه.ش
۱۰ شَعبان المُعَظّم ۱۴۴۷ه.ق
د عاليقدر امیر المؤ منین حفظه الله د حکم پر بنسټ، مولوي نورالدین عمیر د افغانستان اسلامي امارت د کرنې، اوبو لګولو او مالدارۍ وزارت د مالي او اداري مرستیال په توګه تر ټاکنې وروسته د کرنې وزارت او د افغانستان اسلامي امارت د یو شمېر نورو ادارو د چارواکو په حضور کې، د یوې رسمي غونډې په ترڅ کې د یاد وزارت کارکوونکو ته ور وپېژندل شو.
په دې غونډه کې، د کرنې وزارت د قدرتي سرچینو او اوبو لګولو مرستیال او د یاد وزارت سرپرست مولوي بازمحمد فیضان، د لوګر والي قاري صلاحالدین ایوبي، د لوړو زدهکړو وزارت مرستیال مولوي ضیاءالرحمن مدني، د کډوالو او راستنېدونکو چارو وزارت مرستیال مولوي عبدالرحمان راشد، د کلیو د بیا رغونې او پراختیا وزارت مرستیال مولوي شرفالدین مسلم، د اقتصاد وزارت مرستیال مولوي محمدعالم جمیل، دچارو ادارې لوی ریاست مرستیال مولوي سیفالدین تائب، د لوی نظارت، د فرمانونو د تعقیب او پلټنې ادارې مرستیال مولوي محمدمحسن هاشمي، او همدارنګه د کرنې وزارت ګڼ شمېر مجاهدین او کارکوونکي ګډونوال وو.
په دې غونډه کې ګډونوالو ویناوې وکړې او د امارت نظام یې الهي نعمت او د مجاهدینو ستره لاسته راوړنه وبلله او د هغه پر ساتنې او پایښت یې ټینګار وکړ. همدارنګه، پر اسلام، شریعت، حکومتولۍ، د شهیدانو د وینو او د خلکو د قربانیو پر ساتنې، یووالي، له فساد سره پر مبارزې او د امیرالمؤمنین د اوامرو پر اطاعت ټینګار وشو.
وروسته، د کرنې، اوبو لګولو او مالدارۍ وزارت د نوي مالي او اداري مرستیال، مولوي نورالدین عمیر د تقرر متن د چارو ادارې لوی ریاست مرستیال، مولوي سیفالدین تائب له خوا ولوستل شو.
وروسته، د کرنې وزارت مالي او اداري مرستیال په خپلو خبرو کې د امارت نظام او د کرنې او مالدارۍ سکتور ته د خدمت پر ژمنتیا او وفادارۍ ټینګار وکړ او د وزارت له کارکوونکو یې وغوښتل، چې په دې برخه کې ورسره همکاري وکړي. نوموړي همدارنګه په امارتي نظام کې پر اخلاص، رښتینولۍ او ژمنتیا ټینګار وکړ.
په پای کې، غونډه د خیر په دعا سره پای ته ورسېد، مولوي نورالدین عمیر خپل کاري دفتر ته بدرګه شو او د وزارت کارکوونکو ته ور وپېژندل شو.
