کرنې وزارت په ۱۳۹۹ کې څه باندې دوه زره هکټاره مثمر بڼونه جوړوي

۲۵ مرغومي ۱۳۹۸
د کرنې، اوبولګولو اومالدارۍ وزارت د بڼوالۍ او مالدارۍ ملي پروژه «NHLP» د هېواد په تودو ولایتونو (ننګرهار، لغمان، کونړ، خوست، کندهار، هلمند اوفراه) کې د نیالګیو اېښودو کمپاین پیل کړ.
د هوا د مساعدېدو په صورت کې یاد کمپاین نورو ولایتونو ته هم غځیږي.
د بڼوالۍ او مالدارۍ ملي پروژه په پام کې لري، چې په ۱۳۹۹ یم کال کې دوه زره هکټاره مثمر بڼونه جوړ کړي؛ خو دغه شمېره به د بزګرانو د غوښتونو پر اساس زیاد شي.
دکرنې وزارت د بڼوالۍ او مالدارۍ ملي پروژه د هېواد هرې سیمې اقلیم او اب او هوا ته په کتو او دغه راز د بزګرانو په غوښتنه د انګورو، مڼې، زردالو، شفتالو، چهارمغز، انار، املوکو او د نورو مېوو بڼونه جوړوي.
په بڼ جوړولو کې د بڼوالو ونډه ۵۰ سلنه ده او پاتې نور لګښت یې د کرنې، اوبولګولو او مالدارۍ وزارت د بڼوالۍ اومالدارۍ ملي پروژې له خوا ورکول کیږي.