د پکتیا په مرکز او ولسوالیو کې مالدارانو ته روزنیز پروګرامونه ترسره شول
۱۴ مرغومې ۱۴۰۴ه.ش
۱۴ رَجَب المُرَجَّب ۱۴۴۷ه.ق
د پکتیا ولایت د مرکز په ګډون د ځاځي اریوب، څمکني او زرمت ولسوالیو کې د څارویو د ساتنې، د ښه نسلونو د روزنې او د ژمي د خوراکي توکو د برابرولو په موخه یو لړ روزنیز پروګرامونه ترسره شول.
یاد پروګرامونه د کرنې، اوبولګولو او مالدارۍ وزارت د پلاوي لخوا تنظیم شول، چې په ترڅ کې یې د پکتیا په مرکز ګردېز او هره ولسوالۍ کې ځانګړې روزنیز پروګرامونه ترسره شول. په دغو روزنیزو پروګرامونو کې د حیواناتو د ښه ساتنې، د اصلاح شوو نسلونو، د ژمي د خوراک د چمتو کولو (یوریا ټریټمنټ او سایلیج جوړولو) په اړه هر اړخیز معلومات وړاندې شول.
په هره ولسوالۍ کې ۳۰ تنه مالدارانو ته روزنه ورکړل شوه، چې په ټولیزه توګه ۱۲۰ مالدارانو پکې برخه واخیسته. په یادو روزنیزو پروګرامونو کې د څارویو د روزنې آمر او د حیواني تغذیې عمومي مدیر هم ګډون درلود.
د پروګرامونو پر مهال ګډونوالو مالدارانو ته د څارویو د ساتنې، حفظالصحې او د متوازنې او معیاري تغذیې په برخه کې لازم عامه پوهاوی ورکړل شو، تر څو د مالدارۍ سکتور پیاوړی او د مالدارانو اقتصادي ودې ته زمینه برابره شي.
