د کرنې وزارت د بدیل معیشت رییس د کوکنارو د بدیل کښت پروژو د څارنې په پار کندز ته سفر وکړ
۲۳ لیندۍ ۱۴۰۴ هـ.ش
۲۳ جُمَادَى الثاني ۱۴۴۷ هـ.ق
د کرنې، اوبولګولو او مالدارۍ وزارت د بدیل معیشت رییس عبدالخالق محجوب د کاري سفر په ترڅ کې کندز ولایت ته لاړ، څو د کوکنارو د بدیل کښت د تطبیق شوو پروژو څارنه، ارزونه او هر اړخیزه بررسی ترسره کړي او د دغو پروژو د پرمختګ بهیر له نږدې وڅاري.
عبدالخالق محجوب د خپل کاري سفر پر مهال د کندز ولایت د کوکنارو د بدیل کښت اړوند پروژو د تطبیق بهیر، د فعالیتونو د پرمختګ کچه، لاسته راوړنې او په دې برخه کې شته ستونزې په هر اړخیز ډول وڅېړلې. په ترسره شوې ناسته کې د پروژو د اغېزمنتیا، شفافیت او د عملي چارو د کیفیت په اړه تفصیلي خبرې وشوې او د لا ښه تطبیق لپاره لازمې سپارښتنې وړاندې شوې.
د کرنې وزارت د بدیل معیشت رییس وویل، د دغه سفر موخه دا ده چې د پروژو له تطبیقي سیمو څخه مستقیمه څارنه وشي، د اجراآتو د شفافیت او کیفیت ډاډ ترلاسه شي او د بدیل کښت د پروژو واقعي اغېزې وارزول شي. نوموړي زیاته کړه، چې یادې پروژې د بزګرانو د اقتصادي او معیشتي وضعیت په ښهوالي کې مهم رول لري او د غیرمشروع کښتونو پر ځای د مشروع کرنې د پراختیا زمینه برابروي.
محجوب ټینګار وکړ، چې د کرنې، اوبولګولو او مالدارۍ وزارت د هغو پروګرامونو دوامدار ملاتړ ته ژمن دی، چې د مشروع کرنې، د کورنیو تولیداتو د زیاتوالي او د بزګرانو د ځانبسیاینې لامل ګرځي او د کلیوالي اقتصاد د پیاوړتیا لامل کېږي.
په همدې حال کې د کندز ولایت د کرنې، اوبولګولو او مالدارۍ رییس مولوي نیاز محمد عابد د وزارت له پلاوي هرکلی وکړ او د ولایت د کرنیز وضعیت، د بزګرانو د همکارۍ کچې، د تطبیق شوو بدیلو کښتونو ډولونو او تر لاسه شوو پایلو په اړه یې مفصل معلومات وړاندې کړل. هغه وویل، چې د کوکنارو د بدیل کښت پروژې د بزګرانو له لوري په ښه ډول هرکلی شوې دي او د مشروع عایداتي لارو په رامنځته کولو کې یې مثبتې پایلې لرلې دي.
مولوي نیاز محمد عابد همدارنګه د بدیل کښت پروژو پر اغېزمن رول ټینګار وکړ او ویې ویل، چې دغه پروژې د غیرمشروع کښتونو د مخنیوي ترڅنګ بزګرانو ته د دوامدارو عایداتي فرصتونو زمینه برابروي او د کرنیز ثبات او اقتصادي پرمختګ په برخه کې مهم ارزښت لري.
