هېواد کې د ځمکني توتانو تولید سږکال ۹ سلنه ډېر شوي

۳۰ تله ۱۴۰۴ هـ.ش
۲۹ رَبِیعُ الْثاني ۱۴۴۷ هـ.ق
د کرنې، اوبولګولو او مالدارۍ وزارت د احصایې او کرنیزو معلوماتو د ریاست د شمېرو له مخې، سږکال په ټول هېواد کې ۶۸۱ متریک ټنه ځمکني توت تولید شوې ده، چې دا د تېر کال په پرتله ۹ سلنه زیاتوالی ښيي.
په روان کال کې په ټولیز ډول یوزر او ۸۱ هکټاره ځمکه د هېواد په شپږو ولایتونو کې د ځمکني توتانو تر کښت لاندې وه، چې تر ټولو ډېر حاصل د بلخ، هرات او ننګرهار له ولایتونو څخه ترلاسه شوی دی.
تېر کال په هېواد کې ۵۷۵ هکټاره ځمکه د دې مېوې د کښت لپاره ځانګړې شوې وه، چې له هغې څخه ۶۲۲ متریک ټنه ځمکني توتان راټول شوي و.
د بلخ، هرات او ننګرهار ترڅنګ، د بدخشان، پنجشیر او دایکندي ولایتونو بزګرانو هم د ځمکني توتانو کرکېله کوي.
ځمکني توتان د هېواد له ارزښتناکو کرنیزو حاصلاتو څخه ګڼل کېږي، چې د مناسب اقلیمي شرایطو له امله یې کرنه او روزنه په چټکۍ سره د پراختیا په حال کې ده. دغه مېوه د کیفیت له پلوه له بهرنیو محصولاتو سره سیالي کولی شي او په کورني بازار کې هم ښه پلورل کېږي.
د کرنې، اوبولګولو او مالدارۍ وزارت د بزګرانو د ملاتړ او د شنو خونو د جوړولو له لارې هڅه کوي، چې د دې خوندورې مېوې کرنه او ترویج په هېواد کې لا پراخ او ډېر کړي.