دکابل خاکجبار ولسوالی کې ۵۱ اړمنو کورنیو ته ۱۵۳۰ چرګان او د چرګانو خوراکي توکي ووېشل شول
د افغانستان لپاره د کلیو بیاودانولو ادارې «آر.آر.اې.اې» د کابل ولایت د کرنې، اوبولګولو او مالدارۍ ریاست تر چتر لاندې، د «په افغانستان کې د اغېزمنو ټولنو د هوساینې او پیاوړتیا”» پروژې په چوکاټ کې، په خاکجبار ولسوالی کې ۵۱ اړمنو کورنیو ته د ۱۵۳۰ چرګانو ترڅنګ د هغوی خوراکي توکي هم وویشل.
یاده پروژه د ډنمارک د کډوالو شورا«ډي.ار.سي» له لوري تمویل شوې او د کابل ولایت په خاکجبار او سروبي ولسوالیو کې عملي کېږي.
د پروژې د پلان له مخې، دغه مرسته د شنبې په ورځ په سروبي ولسوالی کې ترسره شوه، چې پر مهال یې هرې مستحقې کورنۍ ته ۲۷ چرګې، ۳ چرګان، ۱۵۰ کیلوګرامه دانه، ۱۰۰ ګرامه ملټي ویټامین او ۱۰۰ ګرامه انټيبیوټیک ووېشل شول.
د افغانستان لپاره د کلیو بیاودانولو ادارې «آر.آر.اې.اې» چارواکي وایي، چې د دغو مرستو موخه د کلیوالو ښځو د معیشت پیاوړتیا، د کورني مالدارۍ د سیستم ملاتړ او د اقتصادي ځان بسیاینې د فرصتونو رامنځته کول دي.
