د کرنې وزارت مالي او اداري مرستیال د فومېګېشن شرکتونو له چاراکو سره وکتل

د کرنې، اوبو لګولو او مالدارۍ وزارت مالي او اداري مرستیال ملا آغاجان آخند «حاجي سالم»، د کرنیزو محصولاتو د فومېګېشن خدمتونو درې شرکتونو ـ «کندا فروټ»، «نوی ارغند» او «خالد زبیر لمیټډ» له مسؤلینو سره وکتل.
په دې لیدنه کې د کرنې وزارت مالي او اداري مرستیال وویل، هڅې روانې دي چې د کرنیزو محصولاتو د فومېګېشن لپاره نور مرکزونه هم جوړ شي، تر څو سوداګر او صادرونکي وکولای شي له دغو خدمتونو څخه په مناسبه بیه ګټه پورته کړي.
نوموړي زیاته کړه، د دې ناستې موخه د فومېګېشن د بیې کنټرول، په دې برخه کې د خدمتونو زیاتوالی او له خصوصي سکتور سره ګډ یا خپلواکه همکاري ده.
د «کندا فروټ» شرکت مسؤلینو هم په خپلو خبرو کې وویل، فومېګېشن د حشراتو، فنجي او نورو آفتونو د له‌منځه وړلو لپاره ډېره مهمه پروسه ده، چې د کرنیزو محصولاتو د انباري آفتونو په مخنیوي کې اغېزمن رول لري.
د کرنې، اوبو لګولو او مالدارۍ وزارت اعلان کړې ده، چې پلان لري له خصوصي سکتور سره د فومېګېشن د خدمتونو د پراختیا په برخه کې ګډ کار وکړي، تر څو د هېواد کرنیز محصولات په نړۍوالو معیارونو سره سم صادراتو ته چمتو شي.