د ملګرو ملتونو د پراختیایي پروګرام چارواکو د کندز دکرنې ریاست سره د نویو پراختیایي پروژو پر پلي کېدو خبرې وکړې

۲۴ وږی ۱۴۰۴ هـ.ش
۲۲ رَبِیعُ الْأَوَّل ۱۴۴۷ هـ.ق 
د ملګرو ملتونو د پراختیایي پروګرام «یو.ان.ډي.پي» چارواکو په کندز ولایت کې د کرنې، اوبولګولو او مالدارۍ ریاست له سرپرست مولوي محمد عادل نصرت سره لیدنه ترسره کړه. په دې لیدنه کې دواړو لورو د کرنیزو پروژو د پلي کېدو او پراختیا په اړه نظرونه تبادله کړل.
ددې لیدنې په ترڅ کې د اوبولګولو د سیستمونو جوړول او پراخول، د پروژول پروژو تطبیقول، د لمر په واسطه وچوونکو ماشینونو وېشل، د معیاري سړو خونونو اعمار او د کرنې په برخه کې د نورو پراختیایي پروژو پر عملي کېدو خبرې اترې وشوې.
مولوي محمد عادل نصرت د«یو.ان.ډي.پي» له دفتر څخه د همکارۍ مننه وکړه او ټینګار یې وکړ چې پروژې باید پر وخت پلي شي او د ولسوالیو د بزګرانو اړتیاوو ته جدي پام وشي.
د «یو.ان.ډي.پي»  چارواکو ژمنه وکړه، چې د کندز د کرنې ریاست په همغږۍ به یادې پروژې په اغېزمنه توګه او د سیمه‌ییزو اړتیاوو پر بنسټ تطبیق کړي، څو د دې ولایت د کرنې سکتور د لا زیات پرمختګ زمینه برابره شي.