د خوست ولایت تڼیو ولسوالی کې د ځنګلونو ساتنې او خوړو خوندیتوب لپاره ۵۰ لمریز پخلنځي ووېشل شول

۹ زمری ۱۴۰۴ هـ.ش
۶ صَفَر المُظَفَّر ۱۴۴۷ هـ.ق
د خوست ولایت د کرنې، اوبولګولو او مالدارۍ ریاست د طبیعي سرچینو آمریت او د اړیکو دفتر په مالي همکارۍ، د تڼیو ولسوالی په کمکې ماڼې سیمه کې د ځنګلونو د بیارغونې او خوړو خوندیتوب پروژې تر چتر لاندې ۵۰ دانې لمریز پخلنځي د ځنګلونو د بیارغونې ټولنې استازو ته ووېشل شول.
د یادو پخلنځیو د وېش غونډه د اړیکو دفتر همکارانو او د کرنې ریاست د طبیعي سرچینو آمریت انجنیر زاري جان په حضور کې ترسره شوه، چې موخه یې د ځنګلونو د قطع کېدو مخنیوی، د انرژۍ بدیل سرچینو ته لاسرسی، او د سیمې خلکو ته د پخلي په برخه کې اسانتیاوې برابرول وو.
لمریز پخلنځی د انرژۍ یوه عصري، پاکه، ارزانه او دوامداره سرچینه ده، چې د لمر له وړانګو څخه ګټه اخلي او چاپېریال ته زیان نه رسوي. دا سیستم د سون توکو اړتیا له منځه وړي، د هوا له ککړتیا مخنیوی کوي او د پایدارې انرژۍ د استفادې له لارې د طبیعي منابعو ساتنه تضمینوي.
د خوست د کرنې ریاست چارواکو څرګنده کړه، چې د لمریز پخلنځي استعمال نه یوازې د سیمې کورنیو ته د پخلي اسانتیاوې برابروي، بلکې د ځنګلونو  وهلو او د طبیعي سرچینو د له‌منځه تلو مخه هم نیسي. همداراز، لمریزه انرژي د بریښنا د تولید یو ارزانه او دوامداره حل بلل کېږي، چې د مکتبونو، روغتونونو او زراعتي فارمونو د اړتیاوو د پوره کولو لپاره هم مهم رول لوبولی شي.
د خوست د کرنې، اوبولګولو او مالدارۍ ریاست ژمن دی، چې د طبیعي سرچینو د ساتنې، د چاپېریال د خوندیتوب او د نوې ټکنالوژۍ د معرفۍ له لارې د سیمې خلکو ته لا ډېرې اسانتیاوې برابرې کړي.