د لغمان د کرنې رییس د ملګرو ملتونو د خوړو او کرنې ادارې له مشر سره د همکاریو پر پراخولو خبرې وکړې
۲۲ غبرګولی ۱۴۰۴ ه.ش
۱۵ ذُو الحِجَّةِ ۱۴۴۶ه.ق
د لغمان د کرنې، اوبولګولو او مالدارۍ رییس الحاج مولوي عبدالستار محمد د ملګرو ملتونو د خوړو او کرنې ادارې "اف اې او" مشر ریچارډ سره د قرغیو ولسوالی د چار باغ په سیمه کې وکتل. په دې کتنه کې د اف اې او ختیځ زون مسؤل خوشحال اصفي، د قرغیو بڼوال، بزګران او مالداران هم حاضر وو او د کرنې په بېلابېلو برخو کې د همکاریو پر پراخولو خبرې وشوې.
د کرنې رییس مولوي عبدالستار د یاد پلاوي هرکلی وکړ او د اف اې او له خوا د لغمان ولایت د کرنې او مالدارۍ سکتور ته د ورکړل شوي مالي ملاتړ او پراختیایي پروژو څخه مننه وکړه. نوموړي د ولایت د اقتصادي وضعیت وضاحت ورکړ او ویې ویل چې د لغمان اکثره خلک کرنه او مالداري کوي، خو دا ولایت له اقتصادي پلوه له نورو ولایتونو وروسته پاتې دی.
هغه له "اف اې او" ادارې څخه د غنمو اصلاح شوي تخمونو، کیمیاوي سرو، سوداګریزو شنو خونو او بڼونو، د سبزیجاتو او مېوو د پروسس وسایلو، په جبه زارر ځمکو په ځانګړې توګه د الینګار او الیشنګ سیندونو ترڅنګ د کبانو فارمونو جوړولو، د څارویو لپاره متراکمې خوراکې، نسلي وزو، د تبک وقایوي واکسین تطبیق برخو کې د مرستې غوښتنه وکړه، نوموړي ټینګار وکړ چې دا ډول مرستې به د بزګرانو او مالدارانو په اقتصاد کې مثبت بدلون راولي.
د "اف اې او" ادارې له اوږدې مودې راهیسې د افغانستان په بېلابېلو ولایتونو کې د کرنې، مالدارۍ او خوړو خوندیتوب په برخو کې فعالیتونه ترسره کوي. د یادې ادارې مشر ریچارډ په دې کتنه کې د لغمان د کرنې ریاست له مشرتابه مننه وکړه او ژمنه یې وکړه، چې په یادو برخو کې به نوې پروژې تصویب کړي.
