کندهار کې ۲۰ اړمنو کورنیو ته د کالي جوړولو ماشینونه او اړوند توکي ووېشل شول
۲۷ غویی ۱۴۰۴ ه.ش
۱۹ ذُو ٱلْقَعْدَةِ ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅو، د اروپایي ټولنې په مالي او د هالنډ کمیټې په تخنیکي همکارۍ د کندهار ښار د څلورمې امنیتي ناحیې ۲۰ بېوزلو کورنیو ته د ۹۰ زره افغانیو په ارزښت د کالي جوړولو ماشینونه او اړوند توکي ووېشل شول.
د مرستې په ترڅ کې، هرې کورنۍ ته د ۴۵۰۰ افغانیو په ارزښت ۹ قلمه اړین وسایل ورکول شوي، چې پکې د کالي جوړولو ماشین (څرخ)، کاج، ستنې، اوتو، بکروم، قینچي، د څرخ تېل، ډینمو او صدوق شامل دي. دغه توکي د هغو کورنیو اقتصادي وضعیت ښه کولو په موخه ورکړل شوي، چې له وړاندې یې د عاید مناسبه منبع نه درلوده.
د وېش مراسمو پر مهال، مسؤلینو کورنیو ته د ماشینونو د مؤثر استعمال څرنګوالی او اړوند پروسه تشریح کړه، ترڅو د دغو وسایلو له لارې د خپلې کورنۍ لپاره دایمي عاید تر لاسه کړي.
د کندهار د کرنې ریاست مسؤلینو وویل، چې د دې پروګرام موخه د بېوزلو او اړمنو کورنیو اقتصادي پیاوړتیا، د ځان بسیاینې روحیې لوړول، او د کار زمینې برابرول دي. همداراز، دوی زیاته کړه، چې دا ډول پروژې د ښاري ښځو لپاره یو فرصت دی ترڅو د کور له چاپېریاله بهر وتلو ته له اړتیا پرته اقتصادي مشارکت وکړي.
د یادونې وړ ده، چې یوه اوونۍ وړاندې هم د کندهار د کرنې ریاست په همغږۍ، د اروپایي ټولنې له لوري د ۱۲مې امنیتي ناحیې ۲۰ کورنیو ته پنبې څخه د تار جوړولو ماشینونه وېشل شوي وو.
