د پکتیکا زیړوک ولسوالۍ کې ۲۷ بزګرانو ته د مڼو او چارمغزو ۷زره او ۵۷۰ نیالګي ووېشل شول
۲۴ وری ۱۴۰۴ ه.ش
۱۵ شَوّالُ المُکَرَّم ۱۴۴۶ه.ق
د پکتیکا ولایت د زیړوک ولسوالۍ د کرنې مدیریت په همکارۍ، د کلیو بیارغونې ادارې ار ار اې اې له خوا د دې ولسوالۍ ۲۷ سروې شویو بزګرانو ته ۷زره او ۵۷۰ د مڼو او چارمغزو پسرلني نیالګي ووېشل شول. دغه راز، بزګرانو ته د نیالګیو د کېنولو او ساتنې اړوند روزنیز پروګرام هم برابر شو.
د زیړوک ولسوالۍ د کرنې مدیریت او ار ار اې اې د همغږۍ له مخې، د هغو ۲۷ بزګرانو لپاره چې کرنیزې ځمکې یې مخکې سروې شوې وې، د مڼو «رویال او ګلکسي ورایټۍ» او چارمغزو نیالګیو وېش ترسره شو.
له دغو بزګرانو څخه، ۱۷ بڼوالو ته د مڼو نیالګي او پاتې ۱۰ بڼوالو ته د چارمغزو نیالګي ورکړل شول. وېش د سروې شوې ساحې پر بنسټ تنظیم شوی و، ترڅو هر بزګر ته د ده د اړتیا او وړتیا سره سم نیالګي برابر شي.
بزګرانو ته، د نیالګیو له وېش مخکې، د نیالګیو د سم کېنولو، روزنې او پاملرنې په برخه کې هم مسلکي ټرینینګ ورکړل شو.
