د کندهار دکرنې رییس د تخته پُل ولسوالۍ د میل سیمې له اوسیدونکو سره وکتل
۱۹ کب ۱۴۰۳ه.ش
۹ رَمَضانُ المُبارَک ۱۴۴۶ه.ق
د کندهار د کرنې، اوبو لګولو او مالدارۍ رییس الحاج مولوي فضل الباري فضلي د تخته پُل ولسوالۍ د میل سیمې د دواړو لوریو اوسیدونکو سره ناسته وکړه. د ناستې موخه د میل په سیمه کې د سلګونو جریبه کرنیزو ځمکو پر سر د ځایي اوسیدونکو ترمنځ دعوه وه.
د ناستې په پیل کې، دواړو لوریو د میل سیمې د ځمکو اړوند معلومات شریک کړل او وروسته یې د خپلې ادعا د اثبات لپاره اسناد وړاندې کړل.
ورپسې د کندهار د کرنې، اوبو لګولو او مالدارۍ رییس الحاج مولوی فضل الباري فضلي په خپلو خبرو کې وویل؛ چې د ا.ا.ا هېڅ چاته اجازه نه ورکوي، ترڅو غیرقانوني تصرفات وکړي یا پر یاده ځمکه ناقانونه برمې وکېندي. هغه ټینګار وکړ چې تر څو د ځمکې دعوه او شخړه حل شوی نه وي، هېڅوک باید کرنیزې چارې ترسره نه کړي. نوموړي زیاته کړه، چې د یادو ځمکو د دقیقې او شفافې څېړنې لپاره به د غصب مخنیوي تخنیکي هیئت وټاکل شي، چې د دواړو لوریو له ځمکو له نږدې لیدنه وکړي.
د ناستې په پای کې، د تخته پُل ولسوالۍ اوسیدونکو ژمنه وکړه، چې تر هغو پورې به نوي تصرفات او کرنیزې چارې نه ترسره کوي، ترڅو د موضوع وروستۍ پرېکړه اعلان شي.
