ننګرهار کې سلګونه بېوزله مېرمنو ته د شېدو غواوې ورکول کېږي

د ننګرهار د کرنې، اوبو لګولو او مالدارۍ ریاست په هڅو د (نه انلوس) مؤسسې له لورې د ننګرهار په بهسود، سره رود، کامه او دره نور ولسوالیو کې ۱۷۸ بېوزله او کونډو مېرمنو ته د شېدو غواوې ورکول کېږي.
په همدې موخه د نه انلوس مؤسسې د روم دفتر تخنیکي مشاور ډاکتر مصطفي وزیري او د ختیځ زون دفتر مسؤل عبدالمالک قریشي د ننګرهار دکرنې رییس سره په کتنه کې، د خپلو روانو او راتلوونکو پروګرامونو په تړاو معلومات وړاندې کړل او دننګرهار دکرنې ریاست د همکاریو څخه یې مننه وکړه.
ښاغلي وزیری وویل، چې په ننګرهار کې ۱۷۸ هغو کونډو  مېرمنو ته چې دکورنۍ مسؤلیت ور ترغاړي وي د شېدو غواوې ورکوي، ترڅو د خپل کورنۍ ورځنۍ اړتیاوې پرې پوره کړي.
نوموړې په ننګرهار کې په نورو بېلا بېلو برخو کې د فعالیتونو ترسراوي کې د ننګرهار د کرنې رییس څخه د همکارۍ غوښتنه وکړه.
د ننګرهار د کرنې، اوبو لګولو او مالدارۍ رییس مولوي محمد ولي محسن د مؤسسې مسؤلینو ته په ټولو قانوني چارو کې د همکارۍ او همغږۍ ډاډ څرګند کړ.
همدارنګه د ننګرهار دکرنې رییس د کرنې او مالدارۍ په مختلفو برخو کې د پروژو د پلي کولو غوښتنه وکړه، چې د ښاغلي وزیري له لورې ورته د همکارۍ ډاډ ورکړل شو.