خوست کې د ځنګلونو د ساتنې په پار هڅې کړندي شوي دي

۵ لړم ۱۳۹۸
د خوست د کرنې، اوبولګولو او مالدارۍ ریاست ددې ولایت د ځنګلونو د ساتنې او د ځنګلونو د پرې کولو د مخنیوي په پار هڅې کړندي کړي، چې د پولیسو په ملتیا د ځنګلونو د وهنې د مخنیوي د عملیاتو په ترڅ کې د ځنګل وهنې توکي، لرګي او موټرونه نیول شوي دي.
ددې عملیاتو په لړ کې څلور د ونو اوځنګلونو د پرېکولو ارې، څلور عرادې مازدا موټر، یو عراده ایسکواټر، خیمې، په زیاته اندازه وهل شوي لرګي او یوشمېر نور توکي، چې دونو او ځنګلونو په پرېکولو کې ترې کار اخیستل کیږي ونیول شول او د خوست ولایت امنیې قوندانی ته ور سپارل شوي دي.
ونې او ځنګلونه د هېواد اوسیمې په ښکلا، دهوا په پاکوالي او د طبیعي پېښو په مخنیوي کې مهم رول لري، چې په غیرې قانوني او بې رحمانه ډول قطع کول یې جرم ګڼل کیږي.
د خوست د کرنې ریاست د ځنګل لرونکو ولسوالیو له اوسیدونکو غوښتنه کوي، چې د ځنګلونو د ساتنې او د ځنګل وهنې د مخنیوي په برخه کې دې له دوی سره مرسته وکړي او دهغو کسانو په هکله امنیتي ارګانونو ته مالومات ورکړي، چې ځنګلونه پري کوي.