ننګرهار کې د پیازو د ۱۵ ساتنځایونو د جوړولو چارې بشپړ او ګټې اخیستنې ته وسپارل شول

۶ وږی ۱۳۹۸
د کرنې، اوبولګولو او مالدارۍ وزارت د « GIZ-EU-FARM» موسسې په همکارۍ د ننګرهار په پنځو ولسوالیو کې د پیازو ساتلو ۱۵ ساتنځایونه يا زېرمو د جوړولو چارې بشپړ او ګټې اخیستنې ته وسپارل.
دغه زېرمې هغو بزګرانو ته جوړېشوي دي، چي په سوداګریزه بڼه پیاز تولیدوي.
د پیازو دغه زېرمې، چې ددې ولایت په کامې، ګوشتې، کوز کونړ، رودات او سره رود ولسوالیو کې جوړې شوي دي هر یوه یې شپږ متره اوږدوالی، دوه نیم متر سور، درې متره لوړوالی او د اته ټنه پیازو د ساتلو وړتیا لري.
د ننګرهار د کرنې، اوبولګولو او مالدارۍ رییس انجنیر سمیع الله نصرت وایي، د پيازو د ساتنځایونه په جوړیدو سره به د بزګرانو ستونزې حل او کال دوولس میاشتې به په مارکېټونو کې پیاز په مناسبه بیه وموندل شي .
ددې ترڅنګ بزګرانو او د پیازو سوداګر د یادو زېرمو په جوړیدو خوښي څرګنده کړه او زیاته یې کړه، چې تر دې وړاندې د سړو خونو د نشتوالي له امله یې پياز په ارزانه بیهپلورل کېدل، چې هم دوی ته هم بزګرانو ته یې زیان ډېر و.
باید وویل شي، چې په دې وروستیو کلونو کې د کرنې، ابولګولو او مالدارۍ وزارت له خوا بزګرانو او سوداګرو ته د اسانتیاوو برابرولو په پار د هېواد په بېلابېلو ولایتونو کې د پیازو او نورو سبو او مېوو د زېرمه کولو او ساتلو په موخه لسګونه ساتنځایونه او سړې خونې جوړې شوي دي.