کندهار کې د صنعتي پارک د جوړولو په پار ۵۰۰ جریبه امارتي ځمکه د صنعت او سوداګرۍ ریاست ته وسپارل شوه
۲۵ مرغومې ۱۴۰۴ه.ش
۲۵ رَجَب المُرَجَّب ۱۴۴۷ه.ق
د ا.ا.ا د زعیم عاليقدر امیرالمؤمنین حفظهالله تعالی ورعاه د حکم له مخې، د کرنې، اوبو لګولو او مالدارۍ وزارت د اراضۍ ریاست له لوري، د کندهار د کرنې، اوبو لګولو او مالدارۍ ریاست په تخنیکي همکارۍ، د کندهار د دامان ولسوالی د نودې کلي په سیمه کې ۵۰۰ جریبه امارتي ځمکه د صنعتي پارک د جوړولو په موخه رسماً د صنعت او سوداګرۍ ریاست ته انتقال شوه.
د کندهار دکرنې رییس دځمکو د انتقال او وېش مدیر قاري عصمتالله فرهاد وویل، چې یاده ۵۰۰ جریبه امارتي ځمکه د ټولو قانوني او اداري مراحلو له بشپړېدو وروسته، د ګډ پلاوی په حضور کې د صنعت او سوداګرۍ ریاست ته وسپارل شوه. نوموړي زیاته کړه، چې پر دې انتقال شوې ځمکه به د صنعت او سوداګرۍ ریاست له لوري یو معیاري صنعتي پارک جوړ شي، څو د صنعتي کارخونو د فعالیت، د صنعت د ودې او د سوداګرۍ د پراختیا لپاره ترې اغېزمنه ګټه واخیستل شي.
هغه ټینګار وکړ، چې د امارتي ځمکو د منظم مدیریت، قانوني استفادې او ملي پراختیایي پروژو د پلي کېدو لپاره دا ډول همغږي او همکاري د اړوندو ادارو ترمنځ دوام لري.
د یادونې وړ ده، چې څه کم دوه میاشتې وړاندې هم د عاليقدر امیرالمؤمنین حفظهالله تعالی په ځانګړي حکم، د کندهار په ښورابک ولسوالۍ کې پنځه جریبه امارتي ځمکه د ارشاد، حج او اوقاف ریاست ته د یوه جامع جومات د جوړولو په موخه انتقال شوې وه، چې دا چاره د عامه خدماتو د پراختیا په برخه کې مهم ګام بلل کېږي.
