کابل کې څه باندې ۴۰۰ مستحقو کورنیو ته د چرګانو او وزو وېش لړۍ پیل شوه
د کابل ولایت د کرنې، اوبولګولو او مالدارۍ ریاست، د افغانستان لپاره د کلیو بیاودانولو ادارې «آرآراېاې»، په همکارۍ ددې ولایت په خاکجبار او سروبي ولسوالیو کې« په افغانستان کې د اغېزمنو ټولنو د هوساینې او پیاوړتیا» تر عنوان لاندې پروژه پلې کړې، چې د ډنمارک د کډوالو شورا «ډيارسي» له خوا تمویلېږي.
د دغې پروژې اساسي موخه د خوړو د خوندیتوب پیاوړتیا، د معیشت ښه والی، د کورنیو د عاید لوړول او د زیانمنو کورنیو د اقتصادي مقاومت زیاتول دي، ترڅو د دوامدارې مالدارۍ او ځانبسیاینې لپاره مناسب فرصتونه رامنځته شي.
د پروژې په چوکاټ کې به د خاکجبار او سروبي ولسوالیو ۴۰۷ مستحقو کورنیو ته د چرګانو او وزې ووېشل شي. د همدې لړۍ په لومړي پړاو کې ۲۰۶ مستحقو ګټهاخیستونکو ته د بلاربو او یا شېدې ورکوونکې وزې ووېشل شوې.
د معلوماتو له مخې، هر ګټهاخیستونکي ته دوه بلاربې وزې، ۱۰۰ کیلوګرامه د څارویو د خوراک دانه او دوه بوتله د چینجیو ضد درمل (ډیورمر) ورکړل شول، ترڅو د مالدارۍ د تولید کچه لوړه او د څارویو روغتیا خوندي وساتل شي.
د مرستو د وېش بهیر د کابل ولایت د کرنې، اوبولګولو او مالدارۍ ریاست د مالدارۍ څانګې د آمر اعجاز احمد صالحي، د سروبي ولسوالۍ د مرستیال، او د خاکجبار او سروبي ولسوالیو د کرنې مدیریتونو د استازو په حضور کې، په شفاف او منظم ډول ترسره شو.
د کابل د کرنې، اوبولګولو او مالدارۍ ریاست مسؤلینو وویل، چې د دغسې پروژو پلي کېدل د کلیوالو کورنیو د اقتصادي پیاوړتیا، د مالدارۍ د ودې، د خوړو د خوندیتوب د ښه والي او د زیانمنو کورنیو د ژوند د شرایطو د ښه کېدو لپاره مهم ګام ګڼل کېږي.
د یادونې وړ ده، چې د یادې پروژې په بشپړېدو سره به سلګونه مستحقې کورنۍ د مالدارۍ له لارې د دوامدار عاید سرچینې ترلاسه کړي، چې دا به د فقر د کمولو، د خوړو د خوندیتوب د پیاوړتیا او د کلیوالو سیمو د اقتصادي ودې په برخه کې د پام وړ اغېز ولري.
د کرنې، اوبولګولو او مالدارۍ وزارت د کلیوالي کورنیو د اقتصادي پیاوړتیا، د مالدارۍ د ودې او د خوړو د خوندیتوب د ښه والي په موخه، د نړیوالو همکارو بنسټونو په ملاتړ بېلابېلې پراختیايي پروژې پلي کوي. دغه پروژې د مالدارۍ د تولیداتو د زیاتوالي، د کورنیو د عاید لوړولو او د زیانمنو ټولنو د اقتصادي مقاومت د پیاوړتیا لپاره مهم رول لري.
