هلمند کې یوشمېر کروندګرو ته د ګلپي نبات د ساتنې او افاتو د مخنیوي روزنه ورکړل شوه
۲۵ لړم ۱۴۰۴ هـ.ش
۲۵ جُمَادَى الأول ۱۴۴۷ هـ.ق
د هلمند ولایت کرنې، اوبولګولو او مالدارۍ ریاست د کرنیزو چارو امریت اړوند د بوټو ساتنې او قرنطین عمومي مدیریت مسلکي کارکوونکو ددې ولایت د مرکز لښکرګاه د لوی کاریز سیمې کروندګرو ته د ګلپي نبات د افاتو او ناروغیو د مخنیوي په اړه لارښوونې وکړې.
په دې روزنه کې کروندګرو ته وویل شول، چې ګلپي د نورو سبو په څېر منظمې اوبولګونې، کیمیاوي او عضوي سرو ته په خپل وخت اړتیا لري، څو ښه وده وکړي او د ستونزو د حل لپاره ورڅخه ورځنۍ څارنه تر سره شي.
چارواکو ټینګار وکړ چې ګلپي د انسان د خوراکي اړتیاوو له مهمو سبو څخه دی، دغه سابه په زیاته کچه کاربوهایډرېټونه، پروتینونه، ویټامینونه او معدني مواد لري.
مسوولینو زیاته کړه، چې د ګلپي بوټو پر وخت وقایوي درملنه او د موجوده افاتو او ناروغیو مخنیوی د کروندګرو اقتصادي وضعیت د ښه کېدو او د حاصلاتو د زیاتوالي لپاره ډېر مهم دی.
