هلمند کې د مالدارۍ صنعت په پراخېدو ده

۱۵ سلواغه ۱۳۹۹
هلمند یو له هغو ولايتونو څخه دى، چې ډېرى خلک يې په کرنه او مالدارۍ بوخت دي، د بېلابېلو سبو، غلو دانو او مېوو د تولید ترڅنګ، په دې ولایت کې د مالدارۍ صنعت هم غوړېدلی، چې ورسره په دې ولایت کې د لبني محصولاتو د تولید کچه هم لوړه شوې ده.
د هلمند د کرنې، اوبولګولو او مالدارۍ ریاست د معلوماتو له مخې په هلمند کې د دودیزې مالدارۍ ترڅنګ د مالدارۍ فارمونه هم شتون لري، چې د غواوو ترڅنګ وزې هم په کې روزل کېږي، او په یادو فارمونو کې سلګونو کسانو ته په نېغه او نانېغه توګه د دندې زمینه هم برابره شوې ده.
د هلمند مرکز لښکرګاه د بولان په سیمه کې یو هلمندوال د نسلي وزو یو فارم جوړ کړی دی، چې نږدې ۹۷ نسلي وزې په کې روزل کېږي. یاد فارم کې د «بیټل» په نوم نسلي وزې، چې دوه اقتصادي ګټې لري، اول- زیاتې شېدې ورکوي او دویم دا چې د بچیو د تولید په موخه ورڅخه ګټه پورته کېږي روزل کېږي.
د هلمند د مالدارۍ فارمونو ته په داسې حال کې د ودې زمینه برابره شوې، چې د کرنې ریاست له خوا ددې ولایت مالدارانو ته په ګڼو برخو کې بېلابېل پراګرامونه پلي شوي، چې له هغې ډلې یې، د واکسینونو پلي کول، داوا پاشي، عامه پوهاوی او د اړوند وسایلو ورکړه هغه څه دي چې مالدارانو ته د ترسره شو دي.
ددې ترڅنګ د مالدارانو روزل، په مرکز او ولسوالیو کې د ناروغو څارویو سمپل اخېستل، د کنې او کانګو ضد کمپاینونه په لاره اچول هغه څه دې، چې په د روان کال په ترڅ کې د ارزګان د کرنې او مالدارۍ ریاست له خوا تر سره شوي دي.
افغانستان له اقتصادي پلوه تر ډېره بريده په کرنه او مالدارۍ ولاړ دى، په همدې موخه د کرنې، اوبولګولو او مالدارۍ وزارت هم په دې وروستیو کې د مالدارۍ او د لبنیاتو د پراختیا په پار هلې ځلې کړندي کړي دي.