نورستان کې د ورېښمین پتنګ او خیمهساز چینجي پر ضد میخانیکي مبارزه عملي شوه
۱۵ مرغومې ۱۴۰۴ه.ش
۱۵ رَجَب المُرَجَّب ۱۴۴۷ه.ق
د نورستان ولایت د کرنې، اوبو لګولو او مالدارۍ ریاست له لوري د ورېښمین پتنګ (مور پټدار) او خیمهساز چینجي پر ضد د میخانیکي مبارزې ښوونیز او عملي پروګرام د کامدېش او برګمټال ولسوالیو په یو شمېر کلیو کې تطبیق شو، چې په ترڅ کې یې سلګونه بڼوال وروزل شول او زرګونه مېوه لرونکې ونې له مضرو آفتونو پاکې شوې. دغه پروګرام په هغو سیمو کې عملي شو، چې د روان کال په پسرلي کې د یادو آفتونو له امله سخت زیانمنې شوې وې.
په دې ښوونیز پروګرام کې ټولټال ۴۰۰ بڼوال په عملي ډول وروزل شول، چې د آفتونو د لارو، جالونو او ځالو د راټولولو او سوځولو په ګډون یې د میخانیکي مبارزې عملي طریقې زده کړې. د یادې همغږې او عملي هڅې په پایله کې شاوخوا ۲۰ زره اصله مېوه لرونکې ونې د ورېښمین پتنګ او خیمهساز چینجي له زیان څخه پاکې شوې.
یاده اضطراري پاککاري د روزل شوو بڼوالو په مستقیمه همکارۍ ترسره شوه، تر څو په راتلونکي کال کې د دغو مضرو آفتونو د لا زیات خپرېدو مخه ونیول شي او د سیمې د بڼوالو د تولیداتو کچه لوړه او باثباته شي.
سربېره پر دې، د پروګرام پر مهال بڼوالو ته د نباتي آفتونو د هر اړخیز کنټرول په اړه مهم او ګټور معلومات ورکړل شول، چې پکې په ځانګړي ډول د منی او ژمي وقایوي تدابیر او پروګرامونه شامل وو، څو بڼوال وکولای شي خپل بڼونه د راتلونکو فصلونو لپاره له آفتونو خوندي وساتي.
