ننګرهار کې څه باندې ۱۰۰ مخکښو بڼوالو سره مرستې وشوې

۶ زمری ۱۴۰۰
د ننګرهار د کرنې، اوبولګولو او مالدارۍ ریاست د کرنې وزارت د کرنې د ودې او کلیوالي پراختیا پروژې (CBARD) په همکارۍ ددې ولایت په شپږو ولسوالیو کې په ۱۱۰ مخکښو بڼوالو په بڼونو کې د ناروغیو کنټرول او مخنیوي کڅوړې وېشلي دي.
د ننګرهار د کرنې رییس انجنیر انعام الله صافی وایي، چې ددې ولایت په شپږو ولسوالیو «چپرهار، رودات، اچین، شېرزاد، خوګیانو او کوټ» کې ١١٠ تنو بڼوالو ته د بڼوالې ترویج او په بڼونو کې د ناروغیوکنټرول په موخه کڅوړې، چې ١١ قلمه توکي، «د څانګو پرې کولو قیچې، اره، بکس، د نمونو اخیستلو لینز، نوسې، بوتلې، د هارمونو دجذب یا د ناروغیو د نمونو د جذب بکس، خولۍ ، د توکو اېښودو بکس، لارښود کتاب، دستکشې او نور اړین توکي» په کې شامل دي وېشل شوي دي.
یاد توکي پر هغو بڼوالو وېشل شوي دي، چې د کرنې وزارت د کرنې دودې او کلیوالي پراختیا پروژې (CBARD) له خوا ورته بڼونه جوړ شوي دي.
د ننګرهار د کرنې ریاست د چارواکو په خبره د یادو مرستو ترڅنګ د CBARD پروژې له لارې ۱۰۸ مخکښو بڼوالو او سمیه ییزو کارکوونکو ته
د بڼونو روزنې، ناروغیو کنټرول، د وسایلو ښه  استعمال، اوبخور او په نورو اړوندو موضوعاتو درې ورځنۍ عملي او نظري روزنه هم ورکړل شوي دي.
دغه راز د توکو په وېش غونډه کې ۱۰۰ هغو نارینه او ښځینه مخکښو بزګرانو او اته سیمه ییزو کارکوونو ته چې له ځانه یې وړتیا ښودلې و، ستاینلیکونه هم ورکړل شول.