ننګرهار کې د شولو پروسس کوونکو او بزګرانو ترمنځ هوکړه لیکونه لاسلیک شول

۱۵ لړم ۱۳۹۹
د کرنې، اوبولګولو او مالدارۍ وزارت له دویم ملي لومړیتوب څخه د ملاتړ پروګرام«SNaPP2» په همکارۍ په ننګرهار کې د شولو تولیدونکو او پروسس کوونکو ترمنځ د پېر-پلورهوکړه لیکونه لاسلیک شول.
دغه هوکړه لیکونه ددې ولایت د ۷ ولسوالیو د ۳۵۰ بزګرانو د کرنیزو محصولاتو د بازار موندنې په موخه د شولې تولیدوونکو او د شولو پروسس او وریجو تولیدوونکو شرکتونو ترمنځ لاسلیک شوي دي. ددې هوکړه لیکونو ټولیز ارزشت نهه میلیونه او ۱۰۰ زره افغانۍ ده.
مارکېټ سره د بزګرانو نښلول، د شولو لوړ تولید، د بزکرانو په اقتصادي حالت کې مثبت بدلون او د بزګرانو د محصولاتو لپاره مارکېټ پیدا کول ددې هوکړه لیکونو موخې کڼل کیږي.
ددې هوکړه لیکونو پر بنسټ پروسس کوونکی به د بزګرانو محصولات په لوړه بیه پېري، د ترانسپورت آسانتیاوې ورته براروی، اصلاح شوی تخمونه به چمتو کوي او د امکان په صورت کې به بزګرانو ته وړې پورنه هم ورکوي.
د يادونې وړ ده چې، د کرنې وزارت له دویم ملي لومړیتوب څخه د ملاتړ پروګرام له خوا پر دغو بزګرانو د شولو اصلاح شوی تخم، سره او کاري توکي وېشل شوې او همدارنګه د شولو په کرودندو کې د مهارتونو په هکله بېلابېل روزنې هم دغو بزګرانو ته ورکړل شوي دي.