ننګرهار کې د اوبولګولو یوولس کانالونه ګټې اخیستنې ته وسپارل شول

۱۰ لېندۍ ۱۳۹۸
د کرنې، اوبولګولو اومالدارۍ وزارت د ننګرهار کانال د زېرمو د بیارغونې پروژې (NVDA) په اډانه کې ددې ولایت په پنځو ولسوالیو «سره رود، بهسود، بټي کوټ، غني خېل او مومندرې» کې د اوبولګولو د یوولسو فرعي کانالونو د بیارغولو چارې بشپړ او ګټې اخیستنې ته وسپارل.
د ننګرهار کانال د زېرمو د بیارغونې پروژې (NVDA) چارواکي وایي، چې د دغو کانالونو د بیارغولو ټولیز لګښت ۱۸ میلیونه افغانۍ ده، چې د اسیایي پراختیایي بانک له خوا ورکړل شوې ده.
دغه کانالونه، چې ددې ولایت په سره رود، بهسود، بټي کوټ، غني خېل او مومندرې ولسوالیو کې موقعیت لري په پاخه او اساسي ډول رغول شوي دي، چې د اوبو د تنظیم او وېش په برخه کې د یادو سیمو د بزګرانو ستونزې په اساسي توګه حل کړي دي.
یاد کانالونه په ټولیزه توګه اته زره او ۵۰۰ هکټاره ځمکه خړوبوی او همدارنګه له دغو کانالونو څخه ۳۵ زره کسان په نېغه او زرګونه نور کسان په نانېغه ډول ګټه پورته کوي.
د دغو کانالونو رغول ددې ترڅنګ، چې د اوبو د ضایعاتو مخه نیسي د کانالونو تر پوښښ لاندې ځمکو د حاصلاتو د ډېر والي لامل هم کیږي.