لغمان کې پر یو شمېر بڼوالو د بڼوالۍ اړونده توکي ووېشل شوې
۱۹ غویی ۱۴۰۰
د لغمان د کرنې، اوبولګولو او مالدارۍ ریاست له خوا ددې ولایت پر یوشمېر بڼوالو د بڼوالۍ اړونده توکي وېشل شوي دي.
دغه توکي، چې د بڼوالۍ ځنځیري ارزښت د ودې سکتوري پروژې (HVCDSP) په همکارۍ پر دغو بڼوالو وېشل شوي دي په کې د دوا شیندنې « PRR»پمپ، محافظتي جامې، د ښاخبري وړه او غټه قیچې، د ښاخبري اره، او زینه شامل دي، چې د عصري بڼوالۍ د ترویج په موخه پر بڼوالو وېشل شوي دي.
ددغو مرستو د وېش موخه د بڼوالو ملاتړ او په دې ولایت کې د بڼوالۍ د محصولاتو معیاري کول دي.
باید وویل شي، چې سږکال د یادې پروژې له لارې په دې ولایت کې د سټروسو ۴۹ جریبه بڼونه هم جوړ شوي دي.
