لغمان کې د بېوزله مېرمنو لاس نیوی: پر ۲۰۰ بېوزله مېرمنو څاروي ووېشل شول
د لغمان دکرنې، اوبولګولو او مالدارۍ ریاست د خوړو نړیوال پروګرام «WFP» په مالي او د افغانستان راتلونکې نسلونو «FGA» په تخنیکي همکارۍ ددې ولایت پر ۲۰۰ کونډو او بېوزله ښځو ۴۰۰ وزې او د څارویو خوراکي توکي وېشلي دي.
د لغمان دکرنې، اوبولګولو او مالدارۍ رییس الحاج مولوی محمدولي محسن وویل، چې ددې ولایت پر ۲۰۰ بېوزله او کنډو مېرمنو پر هرې مېرمنې دوه وزې او ترڅنګ یې ۵۰ کیلو ګرامه د څارویو خوراکي توکي وېشل شوي دي، چې ټولیز لګښت یې ۱۰ میلیونه او ۹۲۰ زره افغانۍ ده.
ښاغلی محسن وویل، چې د لغمان دکرنې ریاست هلې ځلې کوي، چې د همکارو مؤسسو په مرسته داسې نورې مرستې راجلب کړي او د لغمان ولایت بېوزله او اړمنو وګړو ته ورسوي.
ددې مرستې موخه د مالدارۍ سکټور پراختیا او په ټوله کې د بېوزله مېرمنو اقتصادي پیاوړتیا ده.
