لغمان کې د امو د کرکېلي دودولو په پار هلې ځلې
۱۵ زمری ۱۳۹۹
د لغمان د کرنې، اوبولګولو او مالدارۍ ریاست چارواکي وایي، چې په دې ولایت کې د امو ونو د ترویج په پار د امو بڼونه یې جوړ کړي او د یادې مېوې ونې یې تر روزنې لاندې نیولي دي، چې پایلي یې مثبتې دي.
د لغمان دکرنې رییس انجنیر محمد جمیل خوشحال وایي، چې لغمان د کرنې او بڼوالۍ لپاره مناسبه هوا، پرېمانه اوبه او ښه خاوره لري، نو په همدې اساس د کرنې اداره په پام کې لري، چې د امو ونو د تکثیر او ترویج په پار د امو بڼونه جوړ کړي دي.
د ښاغلي خوشحال په خبره د لغمان د مرکز مهترلام په ګډون ددې ولایت په علیشنګ، علینګار او قرغیو ولسوالۍ کې په نږدې لس جریبه ځمکه کې د امو ۳۰۰ ونې اېښودل شوي، چې تېر ۱۳۹۸یم کال کې یې حاصلات ۶۰۰ کیلو ګرامه وه او سږ کال یې حاصلات زر کیلو ګرامو ته رسیږي.
ښاغلی خوشحال وویل، چې د لغمان د کرنې ریاست فني او مسلکي کارکوونکي ژمن دي، چې د یادې مېوې د ترویج او پراختیا په پار له لغماني بڼوالو سره هر اړخیز، فني او مسلکي همکاري وکړي تر څو دوی وهڅيږي چې راتلونکي کې د امو بڼونو ته پراختیا او وسعت ورکړي.
