قزاقستان سره د سوداګرۍ د پراختیا په پار د صادروونکو شرکتونو له استازو سره خبرې اترې

۱۴ تله ۱۳۹۸
د کرنې، اوبولګولو او مالدارۍ وزیر نصیر احمد درانی د صادروونکو شرکتونو له استازو سره د یوې غونډې په ترڅ کې قزاقستان ته د صادراتو زیاتوالی او سوداګرۍ اړیکو د پراختیا په پار خبرې اترې وکړې.
په دې غونډه کې، چې د سوداګرۍ وزارت او د سوداګرۍ او صنایعو خونې استازو هم ګډون درلود، ښاغلي درانی وویل، د هغه هوکړې پر اساس چې د افغانستان او قزاقستان هېوادونو ترمنځ شوی دی، قزاقستان دې ته چمتو ده چې له افغانستان څخه ووچ او تازه مېوې او سابه وپېري. ښاغلي درانی زیاته کړه، چې اوس داچاره د افغانستان سوداګرو او صادروونکو پورې تړلې ده، چې تر کومې کچې کولای شي، چې د قزاقستان د مارکېټ اړتیا وې پوره کړي.
په دې غونډه کې په دې پرېکړه وشوه، چې کومې ستونزې چې خصوصي سکټور د قزاقستان ته د صادراتو او سوداګرۍ د اړیکو د پراختیا په برخه کې لري بررسي او وارزول شي او وروسته د دوی د ستونزو هوارولو په پار خپل ستونزې او وړاندیزونه دې دولت ته وړاندې کړي.
په همدې حال کې د کرنیزو محصولاتو یوشمېر صادروونکي قزاقستان سره د سوداګرۍ د پراختیا پر وړاندې یوازنی ستونزه ټرانسپورټي ستونزې وبلل.
د افغانستان او قزاقستان ترمنځ د سوداګرۍ بیلانس نا انډول بیلانس دی، خو دولت په پام کې لري چې یاد هېواد ته د صادراتو له ډلې د ووچې او تازه مېوو او دغه راز د سبو او صنعتي تیکو د صادراتو په زیاتولو سره د سوداګرۍ بیلانس متوازن کړي.