غزني کې د پرمختیايي پروژو پلي کېدل؛ د کارموندنې او اقتصادي ودې لپاره مهم ګام
۹ وری ۱۴۰۵ه.ش
۱۱ شَوّالُ المُکَرَّم ۱۴۴۷ه.ق
د غزني ولایت په مرکز او یو شمېر ولسوالیو کې د «اف جي اې» مؤسسې په همکارۍ بېلابېلې پرمختیايي پروژې پلي کېږي، چې موخه یې د خلکو اقتصادي پیاوړتیا او د کاري فرصتونو رامنځته کول دي.
یادې پروژې د غزني ښار ترڅنګ په مقر او اندړو ولسوالیو کې هم عملي کېږي، چې پکې ګڼ مسلکي او تولیدي فعالیتونه شامل دي. د دغو فعالیتونو له ډلې د شنوخونو جوړول، د چرګانو روزنیز فارمونه، د اچارو تولید، د خیاطۍ مرکزونه او نور حرفوي پروګرامونه دي، چې د خلکو د مهارتونو لوړولو او عاید زیاتولو کې مهم رول لري.
دغزني دکرنې ریاست د چارواکو په وینا، د دې پروژې اساسي موخه د بېکارۍ کموالی، د اقتصادي ودې پیاوړتیا او د خلکو د ژوند د کچې لوړول دي، څو سیمهییز خلک وکولای شي له خپلو مهارتونو څخه په ګټې اخیستنې سره پر ځان بسیا شي.
ټاکل شوې ده، چې د دغو پروژو په بشپړېدو سره به نه یوازې سلګونه کسانو ته د کار زمینه برابره شي، بلکې د سیمې په اقتصادي وضعیت کې به هم د پام وړ مثبت بدلونونه راشي او د ځان بسیاینې فرهنګ به لا پیاوړی شي.
