د کندهار ریګستان ولسوالی کې سلګونو مالدارانو ته د څارویو خوراکي توکي ووېشل شول
۲۷ لیندۍ ۱۴۰۴ هـ.ش
۲۷ جُمَادَى الثاني ۱۴۴۷ هـ.ق
د کندهار د کرنې، اوبو لګولو او مالدارۍ ریاست په هڅو، د ملګرو ملتونو د خوړو او کرنې ادارې (ایف.ای.او) په مالي ملاتړ، د کندهار مهاجرینو مؤسسې (کې.آر.او) په تخنیکي همکارۍ او د ریګستان ولسوالی د کرنې او مالدارۍ مسؤلینو تر څارنې لاندې، په یاده ولسوالۍ کې ۵۰۰ مالدارو کورنیو ته د څارویو خوراکه (کنجاړه) ووېشل شوه.
د یادې مرستې لپاره مخکي د یوې ګډې او عادلانه کمېټې له لوري د مستحقو کورنیو نوملیکنه ترسره شوې وه، چې اوس مهال د اړونده مسؤلینو په حضور کې هرې کورنۍ ته ۲۰۰ کیلو د څارویو خوراکه، ووېشل شوه. سربېره پر دې، د خوراکې د سم او مؤثر استعمال په اړه هم مالدارانو ته اړینه روزنه ورکړل شوه، تر څو د یادې خوراکي څخه ښه ګټه پورته کړي.
د دې مرستې موخه د مالدارانو اقتصادي ملاتړ، د ژمي له رارسېدو سره د څارویو لپاره د مناسبې خوراکې برابرول او له اړمنو مالدارو کورنیو سره پر وخت مرسته کول دي.
د یادونې وړ ده، چې د کندهار د کرنې ریاست په دې وروستیو کې د کرنې او مالدارۍ سکتور د ودې او پیاوړتیا لپاره خپلې هڅې چټکې کړې دي. په همدې لړ کې، تیره اوونۍ هم د «اف.اې.او» نړۍوالې ادارې په ملاتړ سلګونو بزګرانو ته د غنمو اصلاح شوي تخمونه او کیمیاوي سرې ووېشل شوې.
