د کندهار د کرنې ریاست د دوو ګنجونو له اجارې ۲.۷ میلیونه افغانۍ عواید ترلاسه کړي
۵ سلواغه ۱۴۰۴ه.ش
۶ شَعبان المُعَظّم ۱۴۴۷ه.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د اجارې او پانګونې مدیریت مسؤلین وایي، چې د کندهار د لوړ شاوليکوټ ولسوالی د اویان او ګولنکۍ ګنجونو له اجارې څخه یې ټولټال ۲ میلیونه او ۷۱۰ زره افغانۍ عواید ترلاسه کړي دي. یاد ګنجونه د سوداګریزو فعالیتونو په موخه د آزادې داوطلبۍ له لارې په اجاره ورکړل شوي دي.
د کندهار دکرنې ریاست د اجارې عمومي مدیر ملا عبدالحی خالد وایي، چې د اویان ګنج ۱۶ جریبه مساحت لري، چې په ۹۶۰ زره افغانۍ په اجاره ورکړل شوی دی. همدارنګه د ګولنکۍ ګنج ۱۷.۵ جریبه مساحت لري، چې په ۱ میلیون او ۷۵۰ زره افغانۍ د آزادې داوطلبۍ له لارې مستحقو ګټونکو ته د درې کلونو لپاره په اجاره ورکړل شوی دی.
ښاغلی خالد زیاتوي، چې د اجارې ګټونکي پلان لري یاد ګنجونه په معیاري او لوړ کیفیت سره جوړ کړي او ټولې اړینې چوپړتیاوې پکښې برابرې کړي. د نوموړي په وینا، اجارهکوونکي به هر کال د هوکړهلیک له مخې ټاکل شوې اجاره، د ا.ا.ا ملي بودیجې ته تحویلوي.
د یادونې وړ ده، چې د کندهار د کرنې ریاست په دې وروستیو کې د امارتي ځمکو د اجارې هڅې چټکې کړې دي، تر څو د امارتي ځمکو د غصب مخه ونیول شي او د شفاف، قانوني او عادلانه میکانیزم له لارې امارتي ځمکې مستحقو وګړو ته په اجاره ورکړل شي، ترڅو ترې مؤثره، قانوني او اقتصادي ګټه واخیستل شي.
