د کرنې وزارت کې د پانګونې جلب او د ځمکو د اجارې ورکولو غونډه ترسره شوه
۲۸ سلواغه ۱۴۰۴ه.ش
۲۹ شَعبان المُعَظّم ۱۴۴۷ه.ق
د پانګونې د جلب او د ځمکو د اجارې ورکولو تر سرلیک لاندې غونډه د کرنې، اوبو لګولو او مالدارۍ وزارت مالي او اداري مرستیال د مولوی نورالدین عمیر په مشرۍ، ترسره شوه. په دې غونډه کې د پانګونې او د ځمکو د اجارې ورکولو د کمېټې رییسانو او سلاکارانو هم ګډون درلود او خپل نظرونه او وړاندیزونه یې وړاندې کړل.
مولوي نورالدین عمیر په دې غونډه کې ټینګار وکړ چې باید د پانګونې او د ځمکو د اجارې ورکولو د بهیر د اسانتیا لپاره یو روښانه او عملي لارښود جوړ شي، څو بزګران، سوداګر او پانګهوال وکولای شي په کرنیزو برخو کې په لا زیاتې اسانتیا سره فعالیت وکړي.
نوموړي زیاته کړه، چې د کرنې، اوبو لګولو او مالدارۍ وزارت ژمن دی، څو د مناسبو شرایطو په برابرولو سره د کورنیو پانګهوالو لپاره د کرنیزو او سوداګریزو فعالیتونو د ودې او پراختیا زمینه برابره کړي او د هېواد د کرنیزو ځمکو له بالقوه ظرفیتونو څخه په اغېزمنه توګه ګټه واخیستل شي.
دا غونډه د کرنې وزارت د هغو هڅو یوه برخه بلل کېږي، چې موخه یې د کرنې د سکتور ملاتړ او د ځمکو په برخه کې د پانګونې راجلبول دي.
