د کرنې وزارت او د هالند کمېټې ترمنځ د همکارۍ هوکړهلیک لاسلیک شو
۱۸ وری ۱۴۰۵ه.ش
۲۰ شَوّالُ المُکَرَّم ۱۴۴۷ه.ق
د کرنې، اوبو لګولو او مالدارۍ وزارت او د هالند کمېټې ترمنځ «په افغانستان کې د اقلیمي بدلونونو پر وړاندې د پایدارو معیشتونو ښهوالی او د ارزښت ځنځیرونو پیاوړتیا» پروژې د همکارۍ هوکړهلیک په کابل کې لاسلیک شو.
یاده پروژه، چې ۱۲ میلیونه او ۷۹۸ زره او ۵۰۱ امریکایي ډالره ارزښت لري، د څلورو کلونو په موده کې به د هېواد په ۱۷ ولایتونو،له ډلې بدخشان، فاریاب، بلخ، بامیان، کابل، غزني، خوست، پکتیا، میدان وردګ، هرات، بادغیس، فراه، کندهار، ارزګان، لغمان او کونړ کې پلي شي.
د کرنې وزارت د کرنې او مالدارۍ مرستیال، مولوي صدراعظم عثماني، د دې هوکړهلیک د لاسلیک په مراسمو کې د پروژو په پلي کېدو کې پر روڼتیا او اغېزمنتیا ټینګار وکړ او ویې ویل، هغه مالي سرچینې چې پروژو ته ځانګړې شوې دي، د خلکو شتمني ده او باید په شفاف او اغېزمن ډول ولګول شي. نوموړي همدارنګه د داسې پروژو پر طرحه ټینګار وکړ چې د کورنیو اقتصاد ته وده ورکړي او د مالدارۍ محصولاتو د وارداتو کمولو او صادراتو زیاتولو ته زمینه برابره کړي.
په همدې حال کې، د افغانستان لپاره د هالند کمېټې مرستیال، ډاکټر عبدالقادر فخري، د دې ادارې فعالیتونو ته په اشارې وویل، چې ددې کمېټې له خو په تېرو کلونو کې د کرنې وزارت سره په همغږۍ، د هېواد په یو شمېر ولایتونو کې د څارویو وېش، د وټرنرانو روزنه، د واکسیناسیون پلي کول، د حیواني کلینیکونو جوړول، د څارویو د نسل اصلاح او د نباتي افتونو پر وړاندې د مبارزې په برخو کې بېلابېل پروګرامونه پلي شوي دي.
د افغانستان لپاره د هالند کمېټه یوه نادولتي، ناپییلي او غیرانتفاعي اداره ده، چې له درېیو لسیزو څخه راهیسې د کرنې، مالدارۍ او د حیواني روغتیا په برخو کې فعالیت کوي.
