د چاپېریال ساتنې ملي پالیسۍ د طرحې په پار ورکشاپ

۱۸ غویی ۱۴۰۰
د کرنې، اوبولګولو او مالدارۍ وزارت د چاپېریال ساتنې ملي ادارې سره په همغږۍ، د چاپېریال ساتنې ملي پالیسۍ د طرحې، د ژوند د تنوع ملي اسټراټیژۍ تجدید او د وحشي ژویو د غیرقانوني سوداګرۍ د ارزونې په پار مشورتي ورکشاپ په لاره اچولی دی.
د کرنې، اوبولګولو او مالدارۍ وزارت د اوبولګولو او طبيعي سرچینو مرستیال حشمت الله غفوري ددې څلور ورځنۍ ورکشاپ پیل غونډې ته په وینا کې وویل، چې دکرنې وزارت توانېدلی دی، چې د چاپېریال ساتنې د وضعیت د ښه کولو په برخه کې اغېزناک ګامونه وچت کړي، او د پستې او غرني بادامو ۱۸ زره ځنګلونه ورغوي او دکابل په زرغون کمربند کې دوه زره او ۵۰۰ هکټاره ځمکې سمسور کړي. ښاغلی غفوري زیاته کړه، چې د ۲۸.۸ میلیونه نیالګیو تولید، په ۲۲ ولایتونو کې ۴۳۰ زره هکټاره طبیعي ځنګلونو ایجادول، په ۱۲ ولایتونو کې درې زره او ۱۷۸ هکټار څړځایونه رغول، د هېواد په کچه د طبي بوټو له ډلې انجه او شیرین بویې دوه زره او ۶۷۰ هکټاره سیمې بیارغول او خوندي کول ددغو فعالیتونو له ډلې دي.
حشمت الله غفوري وویل: «د کرنې وزارت، اقلیم بدلون سره مبارزه، د شین کوریزو ګازونو ټیټوالی، د چاپېریال ساتنې ښه والی او د ژوند د تنوع ساتنه په پام کې لري او خپل وظیفوي
مسوولیتونه یې ګڼې.»
ښاغلی غفوري دغه راز د چاپېریال ساتنې ملي پالیسۍ طرحې ته په اشارې سره ویول، چې دا سند کولی شي، چې اقلیم بدلون سره د مبارزې، د شین کوریزو ګازونو ټیټولو او د ژوند د تنوع په برخه کې ارزښتناک رول ولوبوي.
دغه راز د چاپېریال ساتنې ملي ادارې د پالیسۍ او تقنین رییس اجمل مرتضوی وایي، چې په دې ورکشاپ کې د چاپېریال ساتنې ملي پالیسۍ د طرحې، د ژوند د تنوع ملي اسټراټیژۍ تجدید او د وحشي ژویو د غیرقانون سوداګرۍ د ارزونې په پار خبرې کېږي.
د چاپېریال ساتنې ملي پالیسۍ د طرحې په مشورتي ورکشاپ کې د ۳۴ ولایتونو څخه نږدې ۲۰۰ سیمه ییز چارواکي ګډون کړي دي.