د هرات د کرنې او مالدارۍ د ټولنې له غړو سره دکرنې وزارت د اطلاعاتو او عامه پوهاوی د رییس لیدنه
۲۵ لړم ۱۴۰۴ هـ.ش
۲۵ جُمَادَى الأول ۱۴۴۷ هـ.ق
د کرنې، اوبولګولو او مالدارۍ وزارت د اطلاعاتو او عامه پوهاوی رییس او ویاند مولوي شیرمحمد حاتمي، هرات ولایت ته د سفر پر مهال د دغه ولایت د کرنې رییس مولوي عبدالحي شاکر په ملتیا د کب روزنې، زعفران، ګلپالنې، شاتو مچیو روزنې، لبنیاتو، قوریهدارانو، مېوو او سبو اتحادیو او د کرنې او مالدارۍ خونې له غړو سره وکتل.
په دې لیدنه کې د کرنې ریاست آمران هم حاضر وو، او د اطلاعاتو او عامه پوهاوی رییس او ویاند د کرنې او مالدارۍ په برخو کې د شته پرمختګونو او فرصتونو په اړه خبرې وکړې.
همدارنګه، د کرنې ریاست آمران د روانو فعالیتونو او لاسته راوړنو په هکله خبرې وکړې او د ټولنو چارواکو خپلې ستونزې او بریاوې شریکې کړې او د خپلو فعالیتونو د پراختیا لپاره د ځمکو د اجارې د بهیر د چټکتیا غوښتنه وکړه.
یاده ناسته د همغږي د پیاوړتیا، د نظریاتو د تبادلې او د ټولنو د ستونزو او لاسته راوړنو د مستندسازۍ په موخه ترسره شوې، څو د کرنې او مالدارۍ د برنامو په لا ښه تطبیق کې مرسته وکړي.
