د نورستان ولایت واما ولسوالی ځنګل کې د اورلګېدنې مخه ونیول شوه
۱۰ غبرګولی ۱۴۰۴ ه.ش
۳ ذُو الحِجَّةِ ۱۴۴۶ه.ق
د نورستان ولایت، واما ولسوالۍ کې د کوردر درې خوړ کلي نه پورته او د پونس کلي اړوند سنګلاح ځنګلي سیمو کې د نامعلومو لاملونو له امله اور لګېدلی و، چې د سیمې د طبیعي شتمنیو لپاره یې جدي ګواښ پېښ کړی و.
د نورستان د کرنې ریاست تخنیکي او مسلکي ټیم، د پیښې له راپور وروسته، ژر تر ژره سیمې ته ورسید او د کلیو له اوسېدونکو او ځوانانو سره په همغږۍ، له ۱۲۰ تنو جوړ وسایلو سمبال ټیم سره د اور وژنې چارې پيل کړې.
د درې شپو او دریو ورځو پرلهپسې هڅو په پایله کې، د اور مخه ونیول شوه او د پراخ زیان مخنیوی وشو. د اور لګېدنې له امله شاوخوا ۶۰ هکتاره ځنګلي سیمه له منځه ولاړه، خو د خلکو، ځوانانو، او کرنې ریاست د کارکوونکو له نه ستړې کېدونکو هڅو سره، د لا زیاتې ځنګلي سیمې د سوځېدو مخه ونیول شوه.
د کرنې ریاست له لوري د اور وژنې ډلې ته اړین وسایل، خواړه، او د څښاک اوبو اسانتیاوې برابرې شوې وې، چې له امله یې د عملیاتو د دوام امکان رامنځته شو.
د دې ګډو هڅو له امله، د طبیعي شتمنیو د خوندي ساتنې یو غوره مثال وړاندې شو، او ښيي چې د ټولنې یووالي او همکاري کولی شي له طبیعي پېښو سره مؤثره مبارزه وکړي.
