د خوست په مالدارۍ مرکزونو کې د خوړو او کرنې ادارې او کرنې ریاست ګډه ارزونه ترسره شوه
۱ لیندۍ ۱۴۰۴ هـ.ش
۱ جُمَادَى الثاني ۱۴۴۷ هـ.ق
د خوست ولایت د کرنې، اوبو لګولو او مالدارۍ ریاست د حیواني روغتیا او مالدارۍ آمر د خواړو او کرنې نړۍوالې ادارې «اف.اې.او» د سوېل ختیځ زون له مالدارۍ تخنیکي مسؤل سره یو ځای، د مالدارۍ اړوند مرکزونو او فعالیتونو د ارزونې ګډ پروګرام ترسره کړ.
په دې ارزونه کې د «اف.اې.او» د سوېل ختیځ زون تخنیکي مسؤل ډاکټر عنبرګل ظفري او د خوست د کرنې ریاست د صحت حیواني آمر ډاکټر انعام الله جاوید ګډون درلود او د ولایت د مالدارۍ مختلف مرکزونه یې وڅارل.
د ارزونې پر مهال د پي پي آر د درېیم پړاو د واکسین کمپاین بهیر، د حیواني کلینیکونو وضعیت، د شیدو راټولولو او پروسس مرکزونه، مسلخ، لابراتوارونه او د مال بازار ساحې په تفصیل سره معاینه شوې.
د لیدنو پر مهال سیمهییزو مالدارانو، د مرکزونو مسؤلینو او ساحوي وترنر ډاکټرانو خپلې ستونزې او وړاندیزونه له پلاوي سره شریک کړل. ښاغلي ظفري ډاډ ورکړ چې یادې ستونزې به د تعقیب او حل لپاره د «اف.اې.او» مرکزي دفتر ته ولیږل شي.
د خوست د کرنې ریاست د ډاکټر ظفري له تخنیکي لارښوونو او د «اف.اې.او» له همکارۍ څخه مننه وکړه او یادې ارزونې یې د مالدارۍ د خدماتو د لا ښهوالي لپاره مهمې وبللې.
