خوست کې د شنو خونو د جوړولو بهیر چټکتیا؛ د وسایلو د وېش پروسه تر تخنیکي څار لاندې ونیول شوه
۱۳ وری ۱۴۰۵ه.ش
۱۵ شَوّالُ المُکَرَّم ۱۴۴۷ه.ق
د خوست ولایت د کرنې، اوبو لګولو او مالدارۍ ریاست اړوند د کرنیزو چارو آمریت تر چتر لاندې، د ترویج عمومي مدیریت په نظارت او د اکشن اېډ مؤسسې په همکارۍ، د ملګرو ملتونو د پراختیايي پروګرام «یوانډيپي» په مالي ملاتړ، د یاد ولایت په مرکز کې د شنو خونو د جوړولو لپاره د وسایلو او تجهیزاتو د وېش له پروسې څخه تخنیکي نظارت ترسره شو.
د چارواکو په وینا، دغه نظارتي بهیر د دې لپاره ترسره شو، څو ډاډ ترلاسه شي چې وېشل کېدونکي وسایل او تجهیزات د ټاکل شوو معیارونو سره سم دي او د شنو خونو د معیاري جوړولو لپاره لازم شرایط پوره کوي.
د نظارت پر مهال د وسایلو بېلابېل سمپلونه له نږدې وکتل شول او تائید شوه، چې ټول تجهیزات له تخنیکي مشخصاتو او منل شوو معیارونو سره سمون لري.
یاد نظارتي بهیر د کرنې ریاست مرستیال مولوي اسلم خان منیب، د ریاست مشاور او متخصص بهیرګل صابري، د ترویج عمومي مدیر عبدالسلام همت یار او د تحقیقاتو د برخې متخصصینو له لوري په مسلکي ډول ترسره شو.
همدارنګه، د خوست دکرنې ریاست مرستیال او مشاور د اکشن اېډ مؤسسې مسؤلینو ته لازمې تخنیکي او مسلکي لارښوونې وکړې، څو د شنو خونو د جوړولو او تجهیزاتو د اغېزمنې کارونې په برخه کې احتمالي ستونزې راکمې او بزګران له غوره او معیاري خدمتونو څخه برخمن شي.
د کرنې، اوبو لګولو او مالدارۍ وزارت په وروستیو کلونو کې د هېواد په بېلابېلو ولایتونو کې د شنو خونو د جوړولو پروژې پلي کړې دي، چې موخه یې د کرنیزو محصولاتو زیاتوالی، د موسم نه بهر تولید، د بزګرانو عوایدو لوړول او د عصري کرنې دودول دي. شنې خونې د اقلیمي بدلونونو پر وړاندې د کرنې د مقاومت د پیاوړتیا لپاره مهم رول لري او د سبو او نورو کرنیزو حاصلاتو په دوامدار تولید کې اغېزمنې تمامېږي.
