بګرام کې پر ۱۰۰ مالدارو کوچیانو د څارویو متوازن خوراکي توکي او درمل ووېشل شول
۱۴ زمری ۱۳۹۸
د پروان ولایت د کرنې، اوبولګولو او مالدارۍ ریاست چارواکي وایي چې، د « CLAP » پروژې په همکارۍ د دې ولایت د بګرام ولسوالۍ پر ۱۰۰ مالدارو کوچیانو د څارویو متوازن خوراکي توکي او د دغو مالدارو کوچیانو د مالونو خوندي کولو په پار د پرازیت ضد درمل وېشلي دي.
د پروان دکرنې ریاست وایي، چې په دې پروګرام کې پر ۱۰۰ مالدارو کوچیانو پنځه زره کیلو د څارویو متوازن خوراکي توکي او د څارویو د داخلي پرازیت ضد درمل وېشل شوي دي.
د څارویو دغه خوراکي توکي او درمل د پروان د کرنې ریاست د هلو ځلو په ترڅ کې د « CLAP » پروژې له خوا چمتو شوې ده ترڅو د څارویو د خوندیتابه کچه لوړه کړي.
باید وویل شي چې، له ناروغیو سره د مبارزې په موخه یاد درمل وېشل او ترڅنګ یې متوازن خواړه له یوې خوا د څارویو په منځ کې د وژونکو ناروغیو د خپراوي مخه نیسي او له بلې خوانه د څارویو په منځ کې د تولید کچه هم لوړوی.
