بلخ کې د پنبې کروندګرو او خصوصي سکټور تر منځ ۱۵۰ قراردادونه لاسلیک شول

۲۶ تله ۱۳۹۹
د کرنې وزارت له دویم ملي لومړیتوب څخه د ملاتړ برنامې « SNaPP2» په همکارۍ او هلې ځلې د بلخ ولایت د پنبې کروندګرو او په دې ولایت کې د خصوصي سکټور ترمنځ ۱۵۰ کرنیز قراردادونه لاسلیک شول.
د یادو قراردادونو پر بنسټ د بلخ ولایت د شولګرې، نهرشاهي، دهدادي، بلخ او دولت اباد ولسوالۍ ۱۵۰ هغه کروندګر چې د پنبې کرکېله کوي۹۰ زره او ۶۱۹ کیلوګرامه پنبه دانې د څلورمیلونه او ۵۳۰ زره او ۹۵۰ افغانیو په ارزښت د « جن‌وپرس برادران صمدي» پر صنعتي شرکت پلوري.
دغه راز خصوصي سکټور ژمنه کړې ده، چې په دې قرادادونو کې شامل ټولو بزګرانو ته به د پنبې د ناروغیو او افتونو په هکله روزنې او تخنیکي سلا مشورې ورکوي، د دوی له کروندو څخه د پروسس تر مرکزه دوی  ته ترانسپورتي چوپړونه هم وړاندې کوي.
د دغو قراردادونو د لاسلیک موخه لوړ ارزښت لرونکو کرنیزو محصولاتو ته تالپاتې بازارموندنه، کارموندنه او د کلیوالو بزګرانو د عوایدو زیاتول دي.
د کرنې وزارت له دویم ملي لومړیتوب څخه د ملاتړ برنامې له خوا تر دې وړاندې پر یادو بزګرانو د پنبې اصلاح شوي تخمونه وېشل شوې وه او دوی ته د پنبې د کرکېلي او حاصل ټولولو په برخه کې فني سلا مشورې هم ورکړل شوې وه.