بلخ کې د پنبې حاصلات ۳۳ زره او ۷۸۷ مټریک ټنو ته ورسېد

۱۷ لیندۍ ۱۳۹۹
د بلخ د کرنې، اوبولګولو او مالدارۍ ریاست وایي، چې ددې ولایت د پنبې د حاصلاتو سږني کچه ۳۳ زره او ۷۸۷ مټریک ټنو ته رسېدلې ده.
د بلخ د کرنې ریاست چارواکي وایي، چې د تېرکال په پرتله په دې ولایت کې د پنبې کروندې زیاتې وې. د یاد ریاست د چارواکو په خبره، تېرکال ددې ولایت په ۱۹ زره او ۵۰۰ هکټاره ځمکه د پنبې کرکېله شوې وه خو سږکال ددې ولایت د پنبې د کروندو کچه ۲۲ زره او ۵۲۵ هکټاره ځمکه وه.
د بلخ د کرنې ریاست وایي، چې په منځنۍ کچه له هر هکټاره ځمکې څخه یونیم تر دوه مټریک ټنه پنبې په لاس راځي.
په بلخ کې د پنبې د کروندو د زیاتوالي لاملونه په لمریزو دستګاوو له سمبالو څاګانو ګټه پورته کول او پنبې کرکېلي ته د بزګرانو لېوالتیا دي.
د بلخ په ولایت کې د پنبې د پروسس یوشمېر فابریکې هم فعالیت لري.