د کندهار تخته پل کې د یو چک ډېم د جوړولو چارې پېل شوې

د کندهار ولایت د تخته پل ولسوالی د بیانزو سیمه کې د ٥٠٠ زره ډالرو په لګښت د اوبو یوې زېرمې «چک ډېم» جوړولو چارې پیل شوې، چې په بشپړېدو سره به یې زرګونه جریبه ځمکه خړوبه شي.
ددې پروژې په پرانیست غونډه کې د کرنې وزارت دکرنې او مالدارۍ مرستیال مولوی صدراعظم عثماني، د کندهار دکرنې ریاست چارسمبال الحاج ملا عبدالنصیر صفت الله، د ګمرکاتو لوی رییس مفتي محمد عیسی، د کندهار داقتصاد رییس مولوی عبدالسلام بریالی، د کندهار امنیه قومندان، دتخته پل ولسوال او ددې ولسوالی یوشمېر مخورو او سپین ږېرو شتون درلود.
 د کندهار دکرنې ریاست چارسمبال الحاج ملا عبدالنصیر صفت الله وایي، چې دا پروژه ملګرو ملتونو  په مالي همکارۍ پلي کېږي، چې د سیمې سلګونه کسانو ته به په کې د کار زمینه برابره شي.
د کندهار دکرنې ریاست چارسمبال وویل، چې د یادې پروژې په پلي کېدو سره به زرګونه جریبه ځمکه خړوبه شي.
هغه زیاته کړه:«د کندهار تخته پل ولسوالی کې د اوبو د زېرمې(چک ډېم) دا پروژه د ملګرو ملتونو په مالي مرسته د ۵۰۰ زره ډالرو په ارزښت پلي کېږي، دغه چک ډېم ۲۲۰ متره اوږدوالی او ۱۳ متره لوړوالی لري، چې د یو میلیون متر مکعب اوبو د زېرمه کولو وړتیا لري، چې په جوړېدو سره به يې زرګونه جريبه ځمکه خړوبه شي او هم به ځایي سلګونه کسانو ته پکې د کار زمينه برابره شي.»
د یادې پروژې د پرانیستې په مراسمو کې دکرنې وزارت دکرنې او مالدارۍ مرستیال مولوی صدراعظم عثماني ولسونو ته په دغه ولایت کې د متوازن انکشاف د رامنځته کېدو ډاډ ورکړ او سپارښتنه یې وکړه، چې دغه پروژه دې د کیفیت له اړخه په اساسي توګه ترسره شي چې د اوږد مهال لپاره ترې ګټه واخیستل شي.
ځایي خلک هم د یادې پروژې له پیل خوښ دي او وایي، په اقتصادي برخه کې  به ورته زیاته ګټه ولري؛ دوی په دې پروژو کې د برخې اخیستنې سربېره له حکومت غواړي، چې د دا شان پروژو په پلي کېدو سره د شاړو ځمکو د ابادۍ لپاره جدي هلې ځلې وکړي.